ViuTV的新節目《晚吹 – 讓我一次買個夠》日前（16日）首播，節目由當奴和練美娟主持，請來伍詠薇擔任第一位嘉賓，向來得罪人多稱呼人少的伍詠薇，恃住自己是前輩不停擺款，除反白眼嘴藐藐外，更瘋狂寸娟姐，又用個背脊得住人。網民戥娟姐慘，忍足成個節目仲要對伍詠薇表現恭敬。今次伍詠薇上ViuTV吸嬲，被網民圍插無品唔識尊重人，乞人憎指數飆升。
有指今次ViuTV搞搞新意思，在全新節目《晚吹 – 讓我一次買個夠》第一集搵來曾是無綫藝人的伍詠薇做嘉賓，希望打頭陣令節目有迴響，點知就造成反效果，節目一開始伍詠薇已經寸寸貢，完全唔畀面當奴及娟姐兩位主持，喧賓奪主自己一輪嘴講自己想講嘅嘢。
伍詠薇在節目開段公開自己的生活開支圖，兩位主持見其住屋費佔最多，於是展開追問為何老公要她夾錢，伍詠薇說：「平時係唔夾㗎，有時我會畀下咁樣囉！」娟姐回一句：「隨心啦呢啲。」伍詠薇勁唔耐煩反白眼說：「呢啲係我嘅家事，唔關你哋事好冇？」當奴嚇了一嚇，笑着打圓場：「呢個節目就係講家事㗎其實都，咁我哋唔講屋啦！講交通開支啦！」
伍詠薇分享自己的儲錢心得，喜歡用現金的她閒時會拎銀紙出來排列整齊然後逐疊數，娟姐表示在風水學上這樣做會令金錢自己湧來，伍詠薇即寸她：「你唔好多事啦！學埋個大頭鬼（Bob林盛斌）講啲嘢！」聽到伍詠薇鍾意食兩餸飯，娟姐表示驚訝，又被伍詠薇鬧：「你依家咩態度呀？……你問我嘢時你唔准笑！」伍詠薇反客為主騎劫了成個節目，明顯對娟姐好唔客氣。
之後娟姐轉話題，指伍詠薇很捨得花錢買內衣及睡衣，家中收藏近400多套，更拍了一條片介紹她的珍藏，伍詠薇表示好後悔沒有穿過這些睡衣影寫真，娟姐回應：「可咩惜啫，你咪依家着番再影囉！」伍詠薇反應極大唔太like，背住娟姐向當奴說：「佢唔好以為自己身材好過我，講埋啲咁嘅嘢。」娟姐面紅耳熱解釋：「梗係唔係啦，真係可以，有心唔怕遲！」並向當奴求救：「你講吖！你公道！」當奴欲化解尷尬氣氛，扭耳仔表示：「對唔住對唔住，我打工㗎咋，sorry，我哋去下個環節啦唔該晒！」明顯見到氣氛尷尬，伍詠薇仲講咗句：「你哋唔好嘈呀！」唔知真係以為佢先係主持。
伍詠薇公開獨特的收藏衣物方法，令衣物不變黃：「搵膠袋包住囉，好似上鏈錶咁得閒拎出嚟，放下啲臭丸落去，又會揈下佢，啲臭丸唔好嘅話痴到會變黃㗎啲嘢，你知唔知呀阿女！阿練美娟！」娟姐面露尷尬說：「真係請教請教！」之後伍詠薇介紹一條早年買入的腰鏈，話自己當年好弗，更轉向娟姐問：「唔知你戴唔戴到呢，呵？」娟姐被窒足全晚，忍得好辛苦。
節目出街後，不少網民都對伍詠薇的寸爆行為非常不滿，認為她不極尊重兩位主持，尤其針對娟姐起晒槓，Facebook社群「中女講呢啲」的版主更出po大講伍詠薇在節目中的所作所為，引起極大迴響，亦有網民在ViuTV的社交網站圍插伍詠薇無品兼趕客，好多人話頂唔順要熄電視，留言包括「真係無品到一個點」、「伍姑娘冇基本禮貌，令到兩位主持尷尬和難堪，亦另我們（觀眾）睇得不開心」。網民亦看得出娟姐的高EQ，大讚她夠專業，戥娟姐不值：「Respect娟姐」、「忍住道氣唔窒返轉頭都難，仲要唔黑面有笑容，專業」、「要畀個叻娟姐」、「娟姐呢集勁委屈，辛苦晒」，ViuTV今次請錯嘉實，真係捉蟲！
當晚節目播出的時候，伍詠薇有份坐在電視機面前捧場，她在Facebook貼出影電視畫面的照片並謂：「而家睇緊ViuTV晚吹新節目，第一集嘉賓就係我啦⋯⋯我自己睇返都笑爆咀！」在伍詠薇下方留言的網民，極大部份都對她的表示表示支持：「綜藝也好，演戲也好，攪笑都好，都能睇得出你係用心去做，好有個性，好真，實在太壓場了」、「可TVB、ViuTV兩邊去雙蠃」、「剛睇完你上此節目。你懂攪笑但2位主持反應不及你！怕被你笑！認識多咗你！原來你可儲存四百幾件睡衣。有趣！」唯獨有一個網友留言表示：「格格不入」。
文章版權為新傳媒集團所擁有，原文請按： 网页链接
