藝人陳茵媺（Aimee）早前復出拍劇，與老公陳豪夫妻檔合作《羅密歐與祝英台》，期間更不幸「中招」，幾經辛苦劇集昨日（16日）終於煞科，Aimee於社交網大晒拍煞科戲嘅花絮片段，見佢同陳豪頭貼頭合影，陳豪即露出冧爆笑容，相當甜蜜，佢哋又同監製及劇組人員齊齊開香檳慶祝，充滿氣氛，Aimee又留言大表不捨：「真的好唔捨得大家！ 愛死你們！」
不過佢哋接受無綫娛樂新聞台訪問時，就表明唔太願意再夫妻檔合作，陳豪表示：「我哋想法冇改變過，站喺演員同觀眾角度，我哋都係抗拒呢件事。雖然今次監製知道我哋嘅想法，特別設計個角色，唔會太過（甜蜜），唔係嗰樣嘢，但如果再經常合作，我驚破壞咗觀眾嘅幻想。作為演員，我覺得Aimee係難得嘅好演員，之後點發展應該交番畀佢話事。」Aimee則坦言復出拍劇後愈拍愈順，現時戲癮大發，但兒子卻非常反對：「我大仔好唔鍾意我拍，佢仲教我返到公司特登做差啲，炒我魷魚就唔使返工，可以留喺屋企陪佢哋。」
