視帝譚俊彥（Shaun）2000年入行，2016年加入無綫後演過不少角色，2021年更憑劇集《換命真相》成功封帝。他近日於熱播劇《麻雀樂團》中演活了麻雀館老闆「司徒久」一角，講述他在太太過世、及後才發現自己有女兒(郭柏妍飾)後的一段尋找親情與自我成長的故事。
譚俊彥形容劇中角色既立體又難得，亦是他演藝路上的一大突破，他笑指「爛撻撻」並非自己強項，角色造型、肢體語言都是新嘗試，接過劇本後便即到處參考。他接受東網專訪時謂：「我記得拍完一場我問監製係咪咁？佢話都未見過我咁演，咁就得喇，我就Keep住咁演。」
譚俊彥坦言隨着年齡增長，自己也開始從小生過渡到中年父親角色，坦言在同一機構當演員10年，仍能獲得這個角色十分感恩：「講真，談戀愛我都想睇黃庭鋒同郭柏妍談戀愛啦！」他笑言戲內戲外自己也是一個父親，年青時拼搏過，受過前輩關照，現在開始懂得放慢腳步照顧新一代：「睇到啲師兄師姐點樣帶領劇組，輪到我自己，都希望成個劇組開心啲。」他坦言現時合拍劇多，難得有今次班底一定要好好珍惜：「依家出去做嘢大家對一次戲就拍，好少可大家一齊食早餐，食完就拍，拍完一齊放飯，呢種家庭式拍攝係TVB碩果僅存。」不過他亦坦言為求突破，自己對拍戲的態度十分嚴謹：「有壓力先有動力，我鍾意逼自己，要對得起角色。」
談到工作展望，他笑稱當然想再次封帝，但明白獎項需要天時、地利、人和配合，所以首先要把握好每個角色。問到有否想過挑戰其他範疇例如當導演？他笑謂：「其實我以前同自己講過想做導演嘅，但同我平輩一齊出嚟嘅好多都已經係大導演啦，我仲去搶佢份工咩？哈哈！既然我做咗演員20幾年，應該繼續做個好演員。」他直言作為演員，去到不同年齡階段也可以有不同角色挑戰，是一個難得兼有趣的行業，自己會繼續去享受。
