視帝馬國明將於6月底首次和太太湯洛雯以夫妻檔出埠獻聲賺家用，可謂夢想成真。另一對模範夫妻蕭正楠和黃翠如則在內地綜藝節目瘋狂放閃，現時「夫唱婦隨」已成藝人最強賣點。
藝人馬國明曾放風指歡迎客戶邀他和愛妻湯洛雯（靚湯）夫妻檔出席活動，如今終於得米，將於6月底在馬來西亞出席品牌活動，是他們婚後首次以夫妻身份吸金。馬國明昨日接受本報訪問時，開心到笑不停：「係第一次兩公婆一齊出埠做嘢，希望機會愈嚟愈多，一齊接Job我哋係無任歡迎。（夫妻檔係咪價錢高啲？）緊係好啲啦，開心價啦。」仍在深圳趕拍無綫劇集《新聞女王2》的他，透露此行因工作忙碌未能順道旅遊。至於靚湯亦大表期待：「係第一次，好耐冇同佢一齊出埠做嘢，所以都幾興奮。」又透露近期忙於籌備新Project，估計老公要忙到11、12月才可小休陪她度假。
另一對模範夫婦蕭正楠（阿蕭）及黃翠如誕下兒子後，首次夫妻檔亮相內地綜藝節目《今晚好犀利》，阿蕭唱歌，翠如則負責伴舞。被主持問到第一次咀嘴是誰做主動時，阿蕭大方表示：「我主動，我同佢未拍拖，仲係拍戲啫！」主持笑他「先下口為強」，翠如搞笑說：「錫完之後，我試過嗰個口味，還可以。」
另外，阿蕭昨日獨自離港飛往馬國，並在社交網上載在機場食麵的短片，向老婆留言：「我負責養家，你負責笑哈哈，等我一下，很快回家。」果然是「愛妻號」。翠如受訪時，對於網民期待她盡快復出，她坦言：「依家都有監製搵我拍節目，我心態係就到時間、情況許可就盡做，不過BB太細，暫時唔敢飛住，隨緣啦！」
