藝人林保怡相隔14年「回巢」，接演無綫熱播劇《刑偵12》，演技獲內地劇迷肯定，他卻自爆曾嫌表現未夠好，決定推牌重新再來，又自嘲：「唔靚仔又冇錢！」如今得到粉絲的愛戴，自然心存感激。
林保怡於《刑偵12》劇內挑戰患上嚴重解離症的角色，由於這套「燒腦劇」已於內地播田畢，不少網民紛紛劇透，又指其功力若未能登上視帝寶座，絕對令人跌眼鏡！他接受東網訪問時，提到年前憑電影《白日之下》先後入圍金像獎、金馬獎和金雞獎，演技獲得大眾肯定，他坦言：「其實喺《瑪嘉烈與大衛》之前，我覺得自己唔係想要呢啲嘢（表現）囉，所以作出檢討，好似塊黑板咁擦走晒所有嘢歸零，然後再重新填番啲想要嘅嘢上去。」
那段日子之前，保怡試過「前呼後擁」的生活：「一出街就Call車，身邊一定有經理人、助手、化妝及梳頭。（依家無欲無求？）唔係點啫？又唔係好有錢，又唔係好靚仔，仲有咁多人鍾意自己，好開心㗎喇！」他又不斷強調自己僅僅是名演員，私生活完全可以卸下明星光環，平日最喜歡走在街市買餸，即使被拍「街坊Look」亦平常心。
拍攝《刑》劇時，劇組最多試過出動5部攝影機同時間進行拍攝，當很多演員都擔心會被拍「醜樣」時，保怡卻樂天表示：「冇乜所謂，拍我唔使特登去就（角度）㗎，人係會長大吖嘛，要接受自己。」他的大度，在於不僅想自己獲得觀眾的肯定，更希望拍檔同樣獲得關注，難怪他對同劇的張振朗及傅嘉莉很有要求，更因此產生「掟劇本」熱議：「演員唔應該死記對白，嚟到片場仲要劇本做乜？咁套劇出街後，傅嘉莉同我講有場戲點先可以好啲，我直接同佢講冇得再嚟過，我哋依家拍嘅嘢，觀眾若干年後都只能翻睇同一場戲，今次演得唔好，咪惟有下次再努力啲囉。（唔怕畀人話好惡？）事實勝於雄辯，我哋煞科宴時好多人都因為唔捨得分開而喊。」
想當年保怡以歌手身份出道，最終卻變身演員，今次《刑》劇有份唱主題曲，問到他可有興趣重返樂壇，他說：「有機會都好㗎，好想試吓同旺角銀行中心嗰班後生仔一齊Busking，其實咁多年我都冇離開過音樂，只係平日喺屋企唱英文歌多啲。（後悔當年放棄歌手身份？）冇喎，唱歌係我嘅興趣，唔想太商業變成搵食，迫我唱啲唔啱我嘅歌有乜謂啫？好彩我決定轉跑道，都算轉身轉得幾靚吖！」
