42歲的林子善是圈中出名的孝順仔，向來重視家庭的他，每年自己生日正日都會跟父母及妻女慶祝。明天（26日）是林子善的爸爸生日，林父因佳人有約所以林子善日前提早為爸爸食素慶生，林父與兒子餅印一樣，而且身材比林子善高大有型。
林子善提前為父慶生
林子善昨日（24日）在IG出生日post，他寫道：「父親生晨，二月二十六日係父親正日生日，首先喺度祝佢日日都健康快樂！因正日佢有同母親有開心節目，所以提早同佢慶祝食素切蛋糕，感謝養育之恩給我智慧和哲學。」
林子善續指食飯時候被廚房師傅大讚他與哥哥都是孝順仔：「我話唔敢當，哥哥就非常我還努力學習當中，我同師傅講係父親佢自己身教，師傅話係呀你爸爸媽咪好孝順，對老人家好好你哋兩個都學到，簡單幾句說話就明白一個道理，身教係一樣非常非常重要嘅嘢，乖乖如果想你第日生嘅小朋友，做一個好人首先你自己做好人，做個好太太好母親好似咪咪咁，成日扮蠢豬但暗地裏非常聰明，你長大後點對爸不你就要睇吓！爸不點樣對爺爺嫲嫲公公婆婆，你第日咁樣對我就得㗎啦哈哈！」
照片可見，身為壽星的林父打扮斯文，他身穿條子襯衫加藍色V領馬甲毛衣，林父左擁孫仔，右擁太太，露出慈祥的笑容。雖然他一頭白髮，但臉上皺紋不多，只是魚尾紋比較多。而林父基因強大，兩子都遺傳了他的粗眉、大鼻及唇薄大嘴，林子善更遺傳了爸爸的腰果眼睛，可惜林父高大魁梧的身材只有哥哥獨有。
林子善多年來演活不少古惑仔及小人物的角色，其實現實是個踏實又孝順的好男人，他於去年的《萬千星輝頒獎禮》上奪得「最佳男配角」時，他於台上領獎時，跪地叩謝雙親，並哭着說：「我要向住全世界去感謝我父母，我所有東西、我啲骨和我啲肉都係父母畀我嘅，所以要感謝佢哋，想將呢個感恩嘅訊息帶畀大家，叫大家要孝順父母。」
