支嚳儀（Venus)和吳大強今日（7/2）現身旺角出席周吉佩《延續·第三人生演唱會》宣傳活動。Venus接受《香港01》訪問時透露，新春期間與家人快閃台灣4日3日，竟換來體力大透支，回港後瞓足3日：「其實見有幾日假期，就即興帶埋個囝飛過去玩幾日，點知去到當地，因為係新年節日，原來好多路邊攤檔係唔開，變咗冇嘢好食，同埋去到嗰度，都係全天候湊住個仔，係冇得享受嘅，囝囝每晚去到11點都唔瞓覺，我真未試過24時湊住佢，變咗我係長時間同佢作戰，都真係好攰。」
相反吳大強聽到Venus與囝囝親子過程表示相當羨慕：「其實我係好懷念嗰陣時對住啲小朋友嗰種感覺，而家佢哋都大晒。以前佢哋細個黐我，到而家我想黐佢都唔俾你黐，變咗而家剩返我哋兩老。（叫阿仔娶老婆生B！）應該會啦，等佢哋自由發揮（兒子揀老婆需要過目？）而家唔使啦，我相信佢哋有獨到眼光嘅，揀個好似我太太咁好嘅好新抱俾我嘅。」
