阮浩棕今晚（25/11）現身尖沙咀出席無綫新劇《異空感應》首播宴。阮浩棕受訪時表示：「今次呢套劇我嘅角色係做法醫助理，而我嘅角色係有一啲秘密喺身，加上劇情係比較沉重，變咗拍嘅時候係比較辛苦，而其中有一幕係講我歇斯底里喺度咆哮，當中發生緊乜事呢？其實嗰啲位係會幾入心入肺，後期大家就會知發生緊咩事。」
另外，阮浩棕亦提到在火場拍攝爆破場口，令他一世難忘：「之前好多爆破場面都係後期製作，但今次唔係，完全係實景拍攝，真係有放火隊嚟放火，同埋真係有爆炸，而嗰次對我嚟講真係好恐怖，因為你會見到成間屋真係著晒火，我係要爬出嚟。我好記得當日武指同我講『阿棕信唔信我？信我就埋位啦』當時我都冇反應，已經係呆咗，只係點頭示意得就埋位。當時我成身都搽晒防火膏，但褲入面小腿冇搽到，結果一到佢爆嘅時候，啲熱力湧出嚟，當時我以為燒到我小腿，但見冇人埋嚟叫停，心諗即係冇事，於是就演埋落去。不過我再演另一場，我係被火燒燶咗右邊眼睫毛，好似電咗髮咁樣，當時自己係唔知，係化妝師發現話俾我先知。」
