TVB劇集《巾幗梟雄之懸崖》當中，蕭正楠一人分飾林茂財，鄧桂平和龍四海三個角色。日前（27/10）《巾幗梟雄之懸崖》宣傳活動中，蕭正楠接受《香港01》訪問時談到分飾三角的細節。
他說：「佢哋三個都冇重覆，中間又有交接位，但係又唔可以話畀觀眾聽究竟係咩關係。今次華標哥呢個劇本，有時係連我都呃埋，邊個扮緊邊個，或者佢真實角色係邊個，其實係畀我自己去諗自己去發揮。」
他表示，三個角色最出位應該是林茂財，但去到劇集中段龍四海出現時，觀眾就將會另一番感受。他說：「佢戴住眼鏡有少少傻氣，其實呢個先係最陰沉，成部我覺得係最精彩嘅角色。」這三個角色都是Final Boss？他回答：「Final Boss就，睇吓大家點睇啦。當然我每次出現都係畀好多危機七爺（胡定欣 飾），亦都畀咗機會去救七爺，所以大家睇佢哋一啲感情都冇，但係我嘅出現係負責將佢哋拉得更加近，所以呢，雖然你話佢係一個狂啲反派，但我覺得佢似係一個月老嘅定位多啲。」
