現年53歲的「TVB御用惡人」彭皓鋒去年7月證實患上直腸癌第3期，直腸內有一個約5厘米的腫瘤，因位置接近肛門，假如接受切除腫瘤手術的話，很大機會終身背著造口袋！一度停工休養的彭皓鋒，小休過後再度出發，雖然目前與腫瘤並存，不過精神狀態基本上分別不大，剛剛在馬來西亞拍劇回來的彭皓鋒，這個行程令他「諗通咗一樣嘢」！
訪問當日，彭皓鋒剛由馬來西亞拍劇回來，他獨自一人精神抖擻的到達訪問地點，假如沒有看過近日關於他患癌的報道，實在很難想像他確診了直腸癌第3期，目前仍在治療中！彭皓鋒坐下不久，便急不及待想分享一個經歷：「嗰啲心態係好重要，唔好一嚟就覺得自己搞唔掂，而家好多人話cancer搞唔到，但係咪一定會有事呢？又或者係咪睇完一定會冇事呢？其實唔會，呢樣嘢係唔知，係經驗問題，我阿媽之前都有cancer，佢最初係喉癌，電療之後好番，隔咗幾個月又話復發，擴散咗去肺，跟住一做化療做走咗，所以係我一路冇做化療嘅原因。」彭皓鋒又說：「而家我嘅腫瘤係細咗，叫做好轉，我係咪用而家嘅方法keep住去維持呢？呢個都係一個選擇，我唔係唔信西醫，而係驚我自己嘅體質未必可以接受化療，當然可能而家嘅化療藥係好咗，我排咗期去做。」
彭皓鋒受腫瘤影響頻去廁所
彭皓鋒今次去馬來西亞拍劇，在短短的4天，竟然令他「諗通咗一樣嘢」，他說：「平時我坐喺度1、2個鐘就想去廁所，但係今次我去到馬拉，化完妝出發之前去一次厠所，直到食晏嘅時候先再去，跟住到5、6點收工前都唔使去， 可能我成日記啲對白，個人嘅專注力去咗第二度，唔會諗住要去廁所。」原來受腫瘤影響，彭皓鋒在日常生活不斷有signal要去廁所，他說：「因為越近肛門就係咁樣，分辨唔到係腫瘤定係大便，只係話畀你知嗰度有嚿嘢喺度，所以呢個係我分享嘅小小經驗，我唔知有冇用，平日唔好當自己好辛苦，你個人搵啲嘢寄托，乜嘢都好，打機又好，搵啲嘢寫下都好，打麻雀都好，畀個腦去諗下第二啲嘢，唔好畀個signal影響，好似我而家要成日去廁所，每日差唔多去10次廁所，如果喺屋企，我可能成日要擺住廁所，雖然係有得去，但係唔多，每次只係去少少，我，但係喺馬拉拍戲點解咁奇怪唔使去呢？呢個可能係思路問題，因為要記對白，不停咁去諗，唔知關唔關事，但係都係一個體會。」
彭皓鋒樂觀面對病魔
自從患癌消息曝光後，彭皓鋒突然間多人認識，除了有傳媒邀請訪問外，連出街都有不少人問候，他說：「雖然我唔想講嚟講去都係關於患癌嘅嘢，但係諗深一層，宣揚啲正能量係好，我試過拜神嗰陣有人叫加油，去覆診又有的士佬車過嚟話加油，講真有病又好、冇病都好，最緊要係開開心心，做人意義都係咁樣，日日搵錢好辛苦，都要搵嘢令自己開心。好似而家我咁嘅情況，你當佢冇得醫，我日日喺度擔心，用咩方法搞好佢？咁我咪日日喺度愁？ 咁不如開心啲，我有老婆仔女，不如同佢哋開開心心，就算我走咗，佢哋都有啲開心嘅回憶，而唔係對住個老竇，覺得佢好慘，又有病，又要愁家用。我而家知道自己體力上係乜嘢狀況而去接嘢做，我之前嗰一年都可以，但係因為屋企人擔心，驚我太操勞，我而家嘅體力係冇之前咁好，我開完工會好攰，咪返去酒店就攤咗喺度，唞夠第二日就開工，本來都諗過慢慢操返自己，好似試過去跑步，但係跑幾步又急急地，唯有慢慢行。」
眼前的彭皓鋒與螢幕上窮兇極惡、為利益可不擇手段、積極進取的角色形象不同，鏡頭後很多事情都「睇得好開」，彭皓鋒淡淡然地說：「做人諗太多冇意思，個天其實有安排，嗰陣離開TVB，冇埋HKTV，個個都以為我搞唔掂，我感受咗好多人生百態，感受到人嘅現實。我離開TVB之後去咗HKTV，點知發唔到牌，其實我係第一個走，我嗰份經理人合約係00001，係第一批開荒牛，但係我都係公司同藝人第一個講搞唔掂嘅人，嗰陣未講話個牌係出唔到，我份約係2月尾完，但係佢哋係6月公布批唔批。」彭皓鋒過檔後工作量大減：「我一年只係做咗5個騷，去到第9個月，嗰陣因為經理人走咗，咁我咪同公司其他人聯絡，點知佢哋唔知原來我有經理人合約，跟住仲話過年之前啲角色已經安排好，未必『攝』到我入去，仲叫我自己上去睇吓搲唔搲到個角色嚟做，又話要搵吓我份合約究竟係點樣。」
彭皓鋒獲HKTV知會否不獲發牌要減薪
經過一星期的研究後，彭皓鋒終於得到公司的回覆：「佢哋話原來我真係有經理人合約，本來話安排過年後嘅工作，點知1月就話我哋個牌應該出唔到，要CUT2/3人工，咁我就話唔好傾喇，唔使養屋企咩？嗰陣好多人話返唔到TVB，咁我咪喺度捱，有一日send個message畀黑妹姐，問吓佢有冇啲騷可以帶埋去做，佢二話不說就叫我出去傾，佢真係好好，去邊都預埋我，有陣時啲騷仲係佢自己拎錢嚟錢畀返啲車馬費我哋，真係冇人會咁樣做，所以一路好多謝佢，到三個月後小青姐（梅小青）就搵我拍《衛子夫》，識咗啲內地製作人，慢慢咪喺內地發展。不過都多謝嗰個經理人，如果唔係佢，未必可以捱到今時今日。」
彭皓鋒不覺人生有起跌
彭皓鋒這一次是人生的一大轉變，但他不覺得自己的人生有起跌，他笑說：「我都冇起過，又點會跌？有陣時啲嘢諗嚟做乜？係幫唔到，唔係你諗就得，真係要隨緣，你紅唔紅唔紅，人哋畀唔畀機會，唔係我想就得，都要睇監製、老闆鍾唔鍾意你，導演拍嗰陣有冇唔舒服，就算嗰啲人鍾意你，但係套戲唔爆，又或者爆完冇嘢跟尾，咪又係冇用，我以前未有cancer嗰陣都係咁諗，但係嗰陣啲人話我灰，其實只不過係有啲嘢你預計咗，但係控制唔到咪放低佢，而家多咗個cancer，咪覺得好似好正能量。」
彭皓鋒深信會康復
目前患癌的彭皓鋒仍在觀察階段，他表示：「喺我角度唔會諗住係拖囉，我會諗醫緊，會醫返好，啱啱發現嗰陣，老婆叫我乜都試吓，但係我覺得試得就要信，唔可以一次就搞掂，都要啲時間我，我啱啱做完檢查，初初發現係5點幾cm，都大㗎！之後一月份去check 8點幾cm，但啱啱又check一次，就落返去7cm，我都排咗期會去做化療同手術。」至於目前的財狀況，彭皓鋒說：「冇諗過，暫時係有幾多用幾多，支持唔到咪食少啲，睇醫生冇計，唔諗咪唔煩，唔夠錢咪唔睇住，演員又被動，我又唔紅，拍一部可能只係捱到2、3個月，咁我咪有得拍咪拍，有得唱咪唱，好多嘢唔係我控制，仲有能力捱到咪去囉，我嘅本份係話畀人知我仲接到嘢，仲開到工，接到咪開心，接唔到都冇辦法。」
