無綫高層樂易玲今日（1日）65歲生日，昨晚（30日）假灣仔舉行生日派對，獲一班小生花旦等到賀，包括佘詩曼、林峯、吳卓羲、胡定欣、袁偉豪夫婦、羅子溢、蔡思貝、張曦雯、譚俊彥等以及昨日生日的林夏薇，還有一眾聲夢歌手以及中年好聲音第一、二季的歌手，合共逾百名賓客，氣氛熱鬧。然而，近期盛傳因續約問題而被雪藏的炎明熹（Gigi）卻未有到場。
主人家樂易玲與兩名兒子約晚上七時半到達，她稱生日願望是身體健康，提到鍾柔美及詹天文等聲夢歌手也有出席，問她有否邀請Gigi時？她表示：「唔係我負責叫，我同同事講，邊個得閒就邊個嚟。（你之前話做人唔好忘本，令人聯想到傳唔續約嘅Gigi？）我成日都咁講，唔怕畀人誤會，我哋訓練班上堂必教點做一個有品德嘅演員，我哋TVB嘅藝人去到邊都畀人讚又乖又勤力演技又好。（續約方面有咩問題？）仲有排慢慢傾。（佢嘅意向係點？）你哋咪問咗佢。（佢係咪畀公司雪？）如果係都唔會幫佢接嘢做同幫佢宣傳歌，呢啲流言成日都傳㗎啦！」當再追問Gigi被指飛出馬場騷？她稱生日不談工作，之後便匆匆入場。
鍾柔美（Yumi）稱準備了蛋糕作禮物，又指剛剛去了打卡粉絲為其新歌所做的應援燈箱。Yumi表示正為將舉行的聲夢三小花演唱會作準備，問到會否想Gigi捧場？她說：「見到佢會好開心，之前佢喺馬鞍山有活動，距離我屋企好近，我感覺到佢喺我附近，大家個心係連埋一齊。（會唔會送門票畀佢？）睇吓佢有冇時間，佢都忙，唔想阻住佢，順其自然。」
朱千雪誕下兒子後首度見人，但明顯未修身，她解釋：「我坐完月一星期咋！我係順產，身體狀態OK，因為家人、先生同陪月好好，所以康復得比我想像中快，生完小朋友第二、三個星期已經覺得同平時冇分別，我坐完月第一日已經出街。」她透露9月正式復工拍攝廣告。問到餵哺母乳問題，她稱奶水足夠，而且不算太辛苦：「只係初時BB喊，我唔知佢發生咩事。我係新手媽咪，多得陪月、媽咪同奶奶睇住，所以冇咁大壓力，我算係可以處理到。依家BB出世個半月，重10磅左右，個個都話BB個樣似爸爸，但我冇所謂小朋友個樣將來會變。（改咗名未？）改名交畀家人決定。（有冇暱稱？）冇，我冇呢啲情趣，亦冇咁有創意，都係叫佢做阿仔，或者交畀網民幫我改。」另外，上月28日是朱千雪的生日，她謂今年是第一年有囝囝陪過生日，還有加拿大返港的父母，難得齊人為她慶生。
張曦雯帶同蛋糕到賀，她稱前一天劇集終於殺青，可以好好休息一個月，之後就要開拍新劇：「係一套喜劇，仲會有少少動作，所以我都要操吓。」她計劃休息期間跟女性朋友到泰國旅行放鬆：「我因為開工瘦咗好多，去到旅行要放肆咁食，養番肥自己。（會唔會晒水着？）可以睇吓心情啦，都可能睇心情啦，都可能會嘅。」
蔡思貝稱最近以拍廣告及出席活動為主：「今次拍廣告一舉幾得，因為我係美容院代言人，可以變靚啲，嚟緊又會為廣告去馬來西亞同新加坡工作，到時可以見到當地嘅粉絲，好開心。」提到久未有劇集工作，問她會否趁空檔去外遊？她直言未有打算，並自認是工作狂：「如果純去旅行會內疚，我想一邊工作一邊旅行，寓工作於娛樂。（又拍旅遊節目？）唔一定係。我反而想去內地，例如北京，我入行時本來想讀演藝，依家好想去內地讀一啲短期嘅演藝課程同學國語，最好有內地工作搵我做，我順便讀書。」又指內地網民對她的評價已變得正面不少，令她大感開心。
譚俊彥帶備美酒到賀，他笑言：「我每年傳統都係送酒，密謀到新年嘅時候開番嚟飲，哈哈！」他表示暫時未需要開工，趁機享受親子時間：「放多一個星期假就開工，會去馬來西亞同澳門做嘢，到時會帶埋小朋友。」他指小朋友正在放暑假，並稱讚他們今年的考試成績不俗：「好滿意，普通話、中文同英文嘅表現都唔錯，最重要係媽媽開心。（你係咪怪獸家長？）某程度上希望佢哋讀書上心，不過佢哋都好乖好自律。」
