現年80歲的殿堂級歌手葉振棠（棠哥），將於下月23日舉行首個紅館演唱會「葉振棠 80告別樂壇演唱會」。近日葉振棠接受商台節目《星光背後》專訪，透露曾申請8次紅館檔期不獲批，更自揭眼疾影響他大半生，曾遠赴加拿大遍尋名醫無效，亦不曾心灰的心路歷程。
在澳門出生的葉振棠患上眼疾近70年，現時只餘下正常人一成視力。葉振棠在節目中自揭讀小四時患眼疾的原因：「當年因為媽咪冇而家呢代咁醒，以為細路仔發燒好閒，唔知我嗰次發燒係大病，原來係傷寒同猩紅熱兩種大病一齊夾擊，發覺遲就燒壞咗啲神經。」
葉振棠透露當時臥床兩個月，至小六時才發現有問題，最初還以為是近視：「小四嗰陣病瞓左兩個月病床，再返學慢慢睇黑板開始矇，到小六以為係近視，但配眼鏡都唔得！最後睇眼科話我視覺神經因為發高燒細胞壞死咗。年輕時嗰陣視力唔係而家咁差，讀中學仲睇到金庸武俠小說，但而家就一定要靠放大鏡先睇到！」隨着年紀漸大，葉振棠坦承視力不斷轉差：「而家我去做檢查，驗眼師話我視力得返正常人十分之一，不過我習慣咗！」
葉振棠指80年代成名後，曾遍尋名醫希望把眼晴問題醫好，他更為此遠赴加拿大：「嗰時搵到錢到加拿大登台，在當地睇過幾個眼科醫生，佢哋都話無辦法，話我視覺神經細胞已經死咗，唔會再生，冇得搞。都無辦法，要努力活下去，而家盡量唔睇書，盡量唔好睇太嘥神嘅嘢。」
葉振棠患眼疾70年卻依然保持樂觀，未有怨天尤人：「我都冇怨過我媽咪，其實係唔關佢事，依個可能係命運！」葉振棠透露早在讀書時已很喜歡唱歌，中學時曾與同學夾band，負責彈bass。葉振棠回憶說當初由澳門來港時沒想過要唱歌，只想找一份寫字樓工作：「但因為視力唔好，好多嘢都做唔到，我仲曾經試過考警察，但係都過唔到視力嗰關。出道近60年，我最大收穫係有一班樂迷同好友一直支持自己。」
