今日（12日）母親節喜事重重，歌手林子祥再度抱孫外，有「最靚婆婆」之稱嘅余安安外孫仔亦順利出世啦！
林子祥兒子林德信（Alex）上年同圈外女友Candace結婚，當時Candace已經肚凸凸，疑似雙喜臨門，不過Alex就一直冇認做爸爸，到咗今日（12日）母親節，佢終於宣布升呢做老竇，於社交網大晒與佗住巨肚嘅太太合照，同埋晒咗太太同BB腳仔嘅相，佢留言祝母親節快樂，並表示：「我媽媽以前常常唱這首歌讓我讓入睡，現在我也會唱這首歌。」唔少圈中好友包括鄭俊弘同太太何雁詩、黃建東、馮允謙等，都有送上祝賀。
林德信表示在兩個月前已成為人父，只是趁母親節這個溫馨日子，才正式向大家宣布。他透露B女取名林明是由爺爺林子祥為孫女改名，他更趁機大晒愛的宣言感謝太太： 「這兩個月見到她坐月好辛苦，又不能出街，只能在屋企湊仔，真係好攰。」問到Candace，老公Alex是否有幫手照顧BB？她點頭說 : 「其實Alex好緊張我，亦好細心，係一個暖男，冇咗佢我真係搞唔掂，Alex係換尿片高手! 」Candace大讚老公細心之餘亦非常搞笑。
原來Alex自細已坐不定，加上等候BB出世更是緊張，Candace爆他笑料說：「因為我係順產，在產房等生產時候，護士問我老公去咗邊度？Alex好緊張又坐唔定，所以常常周圍行希望放鬆一點，又知我等咗12個鐘仲未生得會好肚餓 ，所以去買蛋撻，我就係食住個蛋撻，多點氣力就生到BB！」
Alex透露遲些一家去旅行，但老婆Candace就表示： 「你幫我減肥就係最佳禮物，現在所有褲都唔啱着，要着Alex嘅褲 !」Alex為家庭忙了一段日子，已做好準備全身再投入工作，努力搵奶粉錢，他透露即將推出的新專輯已製作完成，感謝太太照顧家庭，讓他可以專心事業，可謂雙喜臨門。而本身是瑜伽導師的Alex，想將自己新歌的輕快節奏，用來編排一套修身減肥舞，與太太一齊跳。
而余安安大女李文琪（Marcia）本身育有一子Declan，日前誕下二子Owen，再度榮升做婆婆嘅余安安，於社交網宣布喜訊，有大晒B仔腳，以及孖孫仔「拖手」嘅相，留言：「Welcome to our family，今年收到最Precious嘅母親節禮物，就係多咗一個健健康康嘅孫仔，祝大家母親節快樂！」唔少網友都有送上祝福，而曾同佢合作過嘅謝安琪表示：「Congratulations 師傅！真是最好的母親節禮物，非常非常戥你開心，Happy Mother’s Day！」另外，余香凝、周家蔚、梁靖琪都有隔空祝賀。
安安受訪時讚二孫同哥哥似樣，眼睛像Marcia，臉型似女婿，非常靚仔，今日母親節，過往她們一家會出外食飯慶祝，今年女兒正在坐月，故她會到女兒家食飯，由女婿親自下廚，她說女兒誕下兩子好滿足，暫時不會再生，她覺得孫仔健健康康就足夠，透露細女李文騫早年與飛機師男友訂婚移民澳洲，不會催促女兒婚事，笑言：「有人認頭就得。」現時有女有孫家庭幸福，工作亦不俗，是人生收成期，她有份參演的新劇《家族榮耀之繼承者》明天首播，劇中她飾演羅嘉良老婆，從影以來未做過這類角色：「角色係刁蠻少奶，好惡，從未演過咁惡，不過好玩，自己都幾期待出街係點，今次藝員陣容好強，我啲朋友話睇明星都夠睇。」
