全城矚目選美盛事《2025 香港小姐競選》今日（31/7）於電視城舉行候選佳麗外景出發拜神。 2號佳麗甘詠寧 （Phoebe ）接受《香港01》訪問時表示：「今次我帶咗好多護膚品，有防曬乳液同埋面膜，唔少得都有退熱貼，因為本身我個人好怕熱，好容易出汗，亦都好容易令到個妝會變，怕搞到拖慢進度。」
被問到會否擔心被爆黑材料？Phoebe表示：「我自己就唔係好擔心嘅，因為由細到大都係乖乖女。我覺得人生所有經歷，都係造就呢一刻嘅我，無論好嘅同唔好嘅，失敗過嘅成功過嘅，去到呢一刻我係問心無愧。（有否去過夜場？）如果去飲酒嗰啲，都係慶祝生日，又或者特別場合都會飲一兩杯嘅。（感情生活？）我係好多朋友嘅，而我成日都問朋友有冇好介紹，因為我好少會遇到自己合適嘅人，但我都好享受同每一位朋友去相處。」
