藝人姚子羚與張振朗在劇集《反黑英雄》…

藝人姚子羚與張振朗在劇集《反黑英雄》中組成的CP大受歡迎,兩人昨晚(27日)在廣州舉行《黑白戀曲音樂會》,獻唱多首金曲,期間振朗唱到謝霆鋒的《活著VIVA》時,掀起全場大合唱,氣氛高漲,振朗唱畢後直言:「好熱呀,仲要着皮褸。」子羚即時問他:「使唔使除衫?」台下觀眾起哄叫他「除衫」,振朗調皮地說:「佢哋叫你除呀,子羚!」

除了唱歌外,振朗向觀眾作感性剖白:「企喺台上面可以同大家一齊傾偈一齊去玩,我好覺得原來人,成日話堅持就一定得,我發覺係睇你堅持喺啲乜上面,如果我當日堅持唱歌,我相信我絕對唔可以去到今時今日企喺呢度,所以我希望大家除咗堅持之外,都可以試多唔同嘢,令自己搵到屬於自己嗰Part,而我就搵到,好慶幸地,演戲就係我最鍾意嗰樣嘢。」
當他提到家人時卻忍不住哽咽落淚:「我好多謝無論我唱歌定係演戲嘅時候,我嘅屋企人都係無條件去支持我。」有粉絲大叫:「喊得好靚仔呀。」搞到振朗破涕為笑直呼:「黐線!」他稱知道大家都是透過螢光幕去認識他,直言:「其實你哋唔識我,我好想,今晚帶好多我自己嘅過去畀大家聽,今日揀嘅歌都係我自己好鍾意嘅歌曲。」

振朗接受東網訪問時表示很開心,因為所有親戚、最好的兄弟以及愛他的人都有捧場:「好多謝佢哋嚟,而且廣州粉絲好熱情,最開心係唱《活著VIVA》時全部觀眾大合唱,多謝佢哋願意同我一齊玩。」講到淚灑舞台,振朗解釋歌曲《痴心絕對》對他有特別意義:「當年我參加新秀,原本揀咗《痴心絕對》呢首歌,但最後8強時我唱咗另一首歌,我回想如果當年我係唱《痴心絕對》會點樣?可能我未必有機會喺台上同大家傾偈,所謂堅持係要試好多嘢之後,搵到自己啱嘅嘢再去堅持。我係因為講到家人,所以喊,我18歲嘅時候,佢哋好支持我,到今日都係咁支持,從來無變過。」問到會否想跟陳山聰及陳展鵬一樣開巡唱?他坦言當時然,但要先練好歌。

至於子羚同樣感到開心,為音樂會緊張多時,現在終於可以鬆口氣:「同阿朗為咗呢個騷都搵歌唱老師學唱歌,好畀心機練好啲合唱歌,今次嘅排練時間唔係咁多,希望下次再搞嘅會做得更好!同埋好多謝樂小姐、我啲香港朋友同粉絲專誠過嚟,仲要有韓國粉絲專登過嚟睇!好感動。」

而向來人緣好的振朗獲好位好兄弟捧場,包括周嘉洛、謝東閔、朱敏瀚等,嘉洛還在左手手臂寫了「朗朗」兩個字作支持,他又多謝東閔二話不說讓他到其音樂學校練歌,笑言:「仲要唔收錢,佢畀密碼我自己入去,你哋想去佢間音樂學校,你又唔知個密碼,你打畀我,隨便入去。」振朗更大爆原來朱敏瀚的緋聞女友陳曉華也在場:「呢個唔知講唔講得,你哋當冇聽過,陳曉華都嚟咗。」






Leave a Reply

Your email address will not be published. Required fields are marked *