林穎彤（Bella）今日（6/6）現身荃灣出席HOYTV全新節目《好好生活》開廠拜神儀式。林穎彤自從約滿無綫之後，努力不懈增值自己，修畢營養學課程後，開始了新的創業道路，經營網店生意，售賣美容保健品，獲網民支持，生意越做越好。
她接受《香港01》訪問時表示：「算係起步階段，變咗而家就一腳踢，好多網上拍片宣傳都要自己做，同埋會計出貨設計都係一手包辦，咁所以呢一年我都係當學緊嘢。而我都好多謝啲粉絲咁支持，佢哋有幫我落單，咁所以我都好感激佢哋。」
另外，林穎彤又透露除了忙生意之外亦要照顧行動不便的母親，精神上亦飽受壓力：「因為媽咪兩個膝頭退化，搞到行唔到路，之前兩隻腳都腫晒，經過入院治療之後，依家喺屋企休養，依家尚算係屋企可以行得到，但就出唔到門去街，變咗生活上嘅起居飲食，我都要幫佢安頓好晒，先可以去做其他嘢。」
