「8億大馬拿督千金」莊思敏(前名莊鍶敏),近來轉戰內地發展。近年她屢屢投資失利,買樓買舖幾乎都慘遭遇蝕讓,被封「樓市燈神」。之後買的士牌、投資虛擬資產交易平台JPEX先後中伏,被嘲投資界「地獄黑仔王」。而莊思敏在投資界「響晒朵」,竟吸引樓盤邀請她拍廣告。
莊思敏日前為珠海新樓盤賣廣告,片中她對該樓盤讚不絕口,她直言該社區環境似香港灣仔,「其實我覺得呢度有啲似香港嘅灣仔,不過比較開揚、比較舒適,人都冇咁多。」她激讚道:「我即刻覺得我住咗喺度之後,生活品味即刻提升咗!」
莊思敏進入居住社區後身心好放鬆,誇張高呼:「好震撼呀!」最後她睇完樓後不忘大讚:「我都心動喎。」去年4月莊思敏分享在內地河源收樓的片段,該層為清水樓,莊思敏當時明言想用來放租。有網民問河源層樓是否放租,莊思敏回覆:「沒有。你想租?」言下之意似乎指仲未租出。有網民善意提醒莊思敏:「睇住嚟投資啊Jacquline」。
45歲莊思敏據指家族資產估計約8億元,早年曾經以180萬元買入銅鑼坊舖位,但去到兩年前才以60萬元沽出,相較16年前購入價180萬元,帳面勁蝕120萬元或67%。莊思敏在2017年4月斥資逾626萬元購入的何文田加多利軒「納米樓」,近期被稱為「蝕讓之城」,其中一個高層264呎單位早前以590萬元易手,較原業主在2017年購入價692萬元低出66萬元。早前莊思敏受訪稱之前投資的股票有回升,的士牌亦「冇事」,但承認買樓有「少少損手」,今收租收息。而之後她投資加密貨幣USDT,所採用的平台JPEX被揭無牌經營,莊思敏損失約50萬元。