失婚8年江美儀被邀加入性愛社群：我冇咁開放 主持綜藝節目影響交友進度 丨獨家
影視圈
53歲「視后」江美儀主持TVB綜藝節目《一個香港10種玩法過節篇》，鼓勵港人大時大節留港消費，由於趕到邊拍邊出街，自爆玩緊交友APP的她都要停低，玩了1個月未有著落，不過，她卻自爆最近有SP（有性無愛sex partner）社群邀她加入。2016與吳君如胞弟吳君祥離婚，失婚8年的江美儀堅持：「我未有咁開放，唔會接受炮友關係！」因相信：「人生充滿希望，我依然相信愛情。」
江美儀率陳浚霆、胡慧冲、周奕瑋、羅毓儀、蕭正楠、江嘉敏等，於節目中大玩「偽日、泰旅行」、「一日環遊世界」、「HK$100 掃街自助餐食到飽」、「遊港廟．嚐美食」…提供港人過時過節留港消費攻略。對於突然走馬上任，她忍不住幽自己一默，笑說：「可能曾志偉知我得閒。」
合約延期一年「跑數」
江美儀自兩年前奪「視后」後冇劇拍年半，她形容這個是魔咒：「譚俊彥都話，佢攞完『視帝』後都靜咗一輪…但總會過嘅，唔緊要啦，隨遇而安。不過，你問我，梗係想拍返劇啦，我一直好鍾意拍劇，唔鍾意嘅話，點可以喺呢行捱咁耐呀？拍劇又唔係舒服，精神、肉體、工作上都係辛苦，但自己又上咗癮，想繼續拍到好劇集。」她坦言有向公司爭取過：「講真有咁多人，工作量唔可以滿足晒所有人，等經濟好啲，公司多返製作，相信自然會有返嘢做，我成日諗『好嘢喺後面嚟緊㗎啦。』」她跟TVB簽了一年拍20集電視劇合約，因為今年under show，年尾要主持綜藝節目跑數：「呢個節目得10集，仲欠10集，所以我份藝員合約要順延到2015年底，不過，綜藝有辣有唔辣，勝在拍攝時間冇咁長，而且呢個節目好有意思，𠵱家出去食飯，好多店鋪都叫晒救命，呻租金太貴頂唔住。」
小心甜言蜜語陷阱
現在江美儀趁空檔經營自家媒體，做下網台、抖音，之前她於網台節目《娛樂好好玩》中自爆玩交友App，最想搵精壯「炮友」，江美儀更正只是講笑：「我唔係諗住搵到啲乜，純粹係好奇想試探下，究竟而家嘅世界發生咩事？點解會有咁多網騙、情騙？如果好彩嘅話，可能識到個朋友呢！」不過，玩還玩，江美儀忠告大家真的要好小心，小心再小心：「佢哋真係好叻噓寒問暖，迎合你想聽到、想見到，或者想發生嘅嘢嚟𠱁你開心，畀咗好多希望及幻想你，個個都甜言蜜語話『我哋天生一對』、『我倆好夾呀』、『係你㗎啦！』講講下就會有下一步…」
曾被精壯男body迷倒
江美儀以獵奇角度出發，加上識得人多又見過世面，雖然能夠保持清醒狀態，但自爆也曾有過迷失一刻：「有交友男知我鍾意行山，就投其所好，仲傳張行山相嚟，我一望心底即嘩一聲『副body好fit，好大隻喎，心諗：有冇咁著數咁好呀？』點知傾多兩句發現唔多對路，我明明同佢講咗今日會去跑步，下畫佢就訊息問我『做緊乜？』感覺佢同時間跟好多人對答，或者唔係得一個人同我傾偈，所以唔留戀即block，我已block咗好幾個。」自稱玩得不夠投入的美儀又分享搞笑經歷：「有個問我『想唔想睇吓佢操成點？』我一口拒絕答『唔使喇！』因為我唔會send返相畀佢嘅，哈…咁大家最好矇查查或者冇樣，佢哋唔會畀你見到個樣；我都試過被套經濟狀況，當知道收入唔多時就音訊全無。同埋唔好只係網絡上交往，因為會擾亂你嘅理性分析。」另外，她自爆最近有SP群組打她主意，表示：「絕對可以滿足到你嘅要求，資料保密。」對此連美儀也笑了 ：「黐線！我梗係唔會睬佢啦，我唔會接受炮友關係，女人係要有感情基礎，才可以慢慢發展性關係，我未有咁開放，而且有冇伴侶都冇所謂。」
