10月26日係天王郭富城（城城）59歲生日，去年佢大搞生日P，獲大批圈中好友出席同賀，今年佢就先同粉絲一齊過，因為仲係Fans Club成立34周年，令到件事更有意義。今次生日會郭富城以一身火紅上衣現身，相當喜慶。有粉絲上載現場片段，大爆佢一個人就已經講足半個鐘以上，當然亦有同歌迷互動嘅時間，被大讚又靚仔又有禮貌，對粉絲就似足家人咁親切。
當中佢興奮大講寫書法、作畫心得，用嚟比喻人生，要不斷創新、創作自己嗰團火，自己喺疫情時發展出呢兩個新興趣，同佢平時嘅表演、演技好似，令佢收斂自己內心，加上所有創作都可以自己控制晒，成個層次唔同晒，佢覺得好似自己為自己寫咗個劇本一樣，更喺台上公開獻唱新歌《您》，MV入面個「你」字就係出自佢手筆，係佢親自創造嘅新字體，代表將所有歌迷嘅心同佢個心串埋一齊，想同大家一同感受呢份心意。席間佢笑言好多粉絲想送禮畀佢，佢就鼓勵大家去捐錢去佢嘅慈善基金，做善事更有意義。
佢又表示已經積極準備香港個唱part 2，亦有機會係全新表演，佢仲會即場表演書法、作畫，畀大家感受吓佢嘅另一境界。下年1月更會去印尼雅加達開演唱會，佢自己都係第一次去，仲會編排埋下年年中返內地開巡唱。佢一口氣預祝定大家聖誕快樂、新年快樂，非常搞笑。
佢續提起揀咗個自己好鍾意嘅劇本，2月底就會喺國內開拍，佢亦promise大家去研究拍唔拍《九龍城寨》第二集，入面本身個「殺人王」look自己都有畀意見，覺得角色仲有好多變化，又講笑指會好辛苦、打到飛起，如果佢決定接拍就會講畀粉絲聽。而3月佢亦會拍攝新電影，角色會好得意，不過佢只肯透露自己會做追債佬，即引起全場哄動。下年佢亦會繼續有唔同方面發展，更想拍多啲廣告添。
有粉絲亦上載城城切cake片，歌迷會為佢準備一個即席「潑墨」嘅蛋糕，令佢可以展示高超藝術感。之後大會司儀發動台下眾人大唱生日歌時，城城就指揮家上身，拎住刀指揮全場大合唱，場面搞笑。佢一切完蛋糕之後，更High爆高舉蛋糕刀，個樣開心到好似贏咗F1賽車第一名咁開心，即令粉絲尖叫。佢又頒發「學業獎」畀幾位讀書叻叻嘅小粉絲，佢即提醒大家要記得過程，唔係只計成果，佢一定會喺大家後面support佢哋。
