梅啟明在已故天后胞妹梅艷芳的61歲生忌，宣布將與泰籍女友查頌美（May May）結婚。慘「被離婚」的第二任老婆，56歲馬籍Joey嬲到癲，向《星島頭條》提供4年前的家庭照反擊分居6年的說法，更重整時間線公開梅啟明處心積累遺棄兩母子，被呃返大馬的過程。Joey直指梅啟明是「鹹蟲、X街賤男，死窮鬼」，亦認同香港人睇法「梅啟明真係人渣。」Joey強調唔會離婚，更強烈要求梅啟明同兒子交代。採訪：曾盻堅
Joey越講越嬲，大爆梅媽多年來都有畀錢梅啟明玩女人，每次「食完鬆」冇手尾跟，但今次遇著馬籍霸氣妻，對佢作出大控訴：「佢玩女人玩得開心，拍籮柚就走，但今次遇到我咁嘅惡人，我唔會離婚放生佢，除非佢畀足贍養費，仲要親口同個仔講『我唔要佢』」Joey透露當初梅啟明答應過囝囝阿B，話「爸爸用個心嚟錫你，唔會唔要你。」她又奉勸男人有本事先好出去玩女人，明串老公好廢，「畀到家用就出去玩到夠，咪當畀分手費買個自由囉，唔係好似你咁死窮鬼！」Joey又爆梅啟明處心積累呃兩母子返大馬：「2021年8月佢畀你哋(《星島頭條》)影到同泰妹拖手行街；10月份我冒住疫情隔離3周都要返港，用私己錢租酒店6個月，準備搵法援告佢通姦，期間每晚帶個仔返去城市花園(梅媽)屋企食飯，當時梅啟明就死狗咁晚晚煮飯𠱁個仔，但煮完飯就雞咁腳走，搞到個仔爆喊。」
然後2022年3月，梅啟明寫悔過書認錯及承諾同泰妹分手，「佢要求和好重新嚟過，關係回暖；到5月時梅媽唔再續租約，叫我哋一家3口搵地方搬，仲畀咗20萬梅啟明搬屋，佢乘機打發我哋返大馬，訛稱『搬定咗接我哋返去。』」Joey等咗近3年，「每次個仔打畀佢，佢就大聲話『你咪聽隻「發瘟」(Joey)講唔要你啦，爸爸唔得閒做緊嘢呀。』」Joey痛心表示囝囝等到凌晨先打畀爸爸，但梅啟明一樣唔聽。「佢所有都係大話，今年初我返港去咗灣仔警署報警尋人，幫個未成年兒童搵老竇，後來佢終於現身，但見到個仔走都走唔切，驚我交返個仔畀佢，自此就block咗我電話喇！」
泰妹幫梅媽剪指甲
Joey非常怨恨泰妹，仲話見到佢個假樣就想嘔：「佢話有法術上到梅姐身，所以梅媽好鍾意佢，咁老人家梗係易呃，尤其梅媽好錫個仔，泰妹會幫梅媽剪指甲，第一次上去就買成千蚊果籃。年前泰妹喺梅媽身邊打畀我，大聲夾惡話『你信唔信我代梅媽打你？你冇大冇細唔服侍奶奶！』」Joey坦言心直口快所以梅媽唔鍾意佢：「梅媽從冇畀過一毫子我，但我都唔稀罕。」知梅媽想抱孫，Joey曾兜口兜面同梅媽講「點生呀，生到你個仔咁呀！三歲定八十，你覺得個仔會變返好人？」直至結婚10年40歲高齡才為梅家生仔。而Joey不在港期間，梅啟明親口向她承認做『阿媽世界』，「慶幸上天保佑我個仔又叻又乖。」
兒子屈到病唔開心
Joey對梅啟明冇晒感情，但心痛個仔掛住爸爸屈到病：「自2021年拖手事件後佢就傷心到今時今日，話『周身骨痛、心口痛、透唔到氣…』佢係優秀青少年，鋼琴及芭蕾舞獲獎無數，𠵱家冇晒笑容及自信，又見佢翻睇父子舊相，梅啟明真係人渣中人渣嚟。」因為歲數問題，Joey只能做補習老師賺錢，兩母子只能住劏房：「同佢講都冇用，佢話知你瞓街。」對於梅啟明重婚，Joey不屑說：「我真係恭喜佢呀，梅啟明個鹹蟲，記得提佢去精神科覆診喎。」Joey透露意外知道55歲泰妹都要定期睇精神科：「梅啟明曾親口同我講『泰妹熱情又風趣，冧得我及阿媽開心，而且係我嘅同道中人(亦要睇精神科)。』」
