有娛圈「筍盤」之稱的馬國明（馬明），去年尾終於做「老襯」，跟拍拖3年多的湯洛雯成婚。年屆50的馬明，向來思想傳統，一心想開枝散葉，故婚後兩公婆都落力調理身體，加快造人計劃。
除了改善個人體格之外，馬明夫妻又獲得玄學高人指點，近年連環搬愛巢，由將軍澳搬到何文田，近日再進駐九肚山的豪宅，務求催旺添丁運，令生B大計盡快實現！
現年50歲的馬國明（馬明），為人做事非常之有分寸，去年底跟湯洛雯（靚湯）於泰國蘇梅島完婚後，生活亦作了周詳的計劃。因兩人婚前已同居試婚，預先享受了二人世界，夫妻生活也經已磨合，故婚後已有共識，馬上調理身體，開行turbo生B。他坦言︰「好歡迎上天俾我哋呢份禮物（BB），好樂意接受，當然要調理好身體，太太𠵱家都食得健康。」
據悉，馬明和靚湯在飲食和運動方面都落足功夫。靚湯直認中西合璧保健︰「卵子好重要，我有睇中醫調理，朋友都好關心我健康，介紹不同嘅保健品。我有食葉酸，老公都有食，亦有搵營養師幫忙。」
此外，夫妻又勤做運動，馬明喜歡踢波；而靚湯則愛踩健身單車和打羽毛球。馬明還強調自己年年都有驗身：「我身體長期狀況都OK，驗身報告話以我現時嘅年紀屬於好勁，所有指數都靚仔。」
馬明和靚湯自去年結婚後，早已有共識生B。日前從佛山拍劇返港的馬明，即陪伴老婆行街「血拼」，然後返屋企煙韌。
去年12月，馬明跟靚湯於泰國蘇梅島完婚，兩人恨做父母，婚後即馬上調理身體，為生B做準備。
體魄強健的馬明，成家立室後隨即投入工作賺錢養家，剛拍畢新劇《執法者們》，又北上客串《巨塔之后》，再出演電視電影《尋夢琴澳》。而靚湯自去年參演《隱門》後，便未有接拍新劇，除間中拍攝廣告及出席商演外，主力養好身子；另外，她還做「跟得夫人」陪伴老公開工，爭取相處時間造人。
此外，本刊還發現，馬明夫妻近大半年來連環搬竇。前年8月，原居於太古城2千萬元頂層複式單位的馬明，自揭與靚湯於將軍澳同居；期間，有搬運公司曝光了兩人愛巢的照片，但他卻不介意，照住可也，直至跟靚湯成婚，才換個新愛巢。
今年初，靚湯出席活動時，直說自成人妻後，有了家庭責任，變得精打細算︰「婚後慳家咗，成日想儲多啲錢，咁將來可以俾多啲資源BB。𠵱家買嘢會先考慮，唔會一鍾意就買，加上我哋想買樓，我哋工作周圍走，咩地區都得，遠啲啲，可買大少少。我呢排都忙搬屋，到時搞農曆新年派對。」當日，離開活動現場後，她就驅車直奔往何文田窩打老道的單幢式豪宅打點，據悉兩人租住的單位，月租約4萬元。
不過，僅短住了幾個月，兩公婆又再搬到位於九肚山的低密度豪宅。據密友透露，背後原來有玄學高人指點，新居不僅可催旺添丁運之餘，還可讓家宅平安。據悉，他們所租住的是一個約1,800呎的4房單位，月租約7萬元，夠晒空間迎接小生命來臨，加上靚湯的父母住在馬鞍山，方便過來照應。
主張男主外、女主內的馬明表示，已向圈中好老公陳豪請教養妻活兒大法︰「男人負責搵錢，一頭家嘅開支大，所以交由女方去負責，將來如果有小朋友後，會計劃有共同戶口，分配家中嘅費用及小朋友嘅書簿費。雖然佢（靚湯）性格比較大頭蝦，但唔會被人呃錢，我決定以後只會每月攞零用錢。我之前有向陳豪請教，佢同樣每個月只攞零用錢。」
而靚湯亦一心做賢妻，負責管好財政，以及打理好家庭，並已為子女的未來教育鋪路，她笑言︰「如果將來生女，女就可以讀我嘅母校（聖保祿），仔就讀老公嗰間（慈幼）。」兩公婆都有晒做父母的準備，日前又連環出埠，先到日本參加蔣家旻的婚禮，還趁機在當地遊玩一番；之後，他們再陪伴外父外母𣈱遊韓國，在外地可以放下香港的壓力，造人應該更加得心應手！
