已故天后梅艶芳的72歲哥哥梅啟明近日驚爆第三度結婚，宣布泰籍女友查頌美（May May）將成為新梅太，預告將於周四（10日）舉行記者會公布詳情。梅啟明突然高調公布再婚消息後，其大馬「前妻」Joey卻踢爆二人根本未搞離婚手續，若他再娶就是重婚，梅啟明則堅稱對方早已「搞離婚」。梅啟明聲言希望懸紅找出被姪仔梅柏麟「軟禁」的梅媽，昨日（7日）梅媽終透過好友開腔。
對於梅啟明聲稱梅媽很支持他再婚，幾年前送過價值十多萬的手鈪予May May，又指梅媽現時處境危險。對此，近年經常稱代梅媽發聲的《娛樂小奶媽》主持潘小文，昨晚開直播時都有談及此事：「Auntie（梅媽）唔知道佢結婚呢單嘢，事實上佢都唔想再見到呢個人（梅啟明），成件事我哋好可以肯定一樣嘢，呢條粉腸係趁梅姐10月10號生忌要搞事，Auntie知道咗好唔開心，好唔高興！佢話叫Auntie出嚟主持大局，佢想吓得㗎喇，Auntie冇乜嘢都唔想再見到呢個人。佢問Auntie攞首飾呢樣嘢，Auntie都講，基本上過去嘅時間，有金飾、有金器都已經攞晒畀佢打官司，邊度有錢有呢啲金飾？梅生你可以慳啲，你老母唔會理你。」
潘小文稱梅媽得到適切照顧
潘小文又指自己代梅媽報平安否認被禁錮，且得到非常適切照顧，拒見梅啟明是刻意避開。潘小文在節目中指：「佢話唔知Auntie搬咗去邊，點解會唔知？因為你過去咁多年，只係為咗問Auntie攞錢。你記住之前做過嘅嘢，點樣搵槌仔揼爛屋企所有鎖，Auntie今時今日都歷歷在目。Auntie搬咗之後，你日日走去人哋屋苑大吵大鬧，人哋屋苑都唔能夠有落腳地方，梗係搬屋，你話Auntie俾人軟禁，你老母冇俾人軟禁，佢生活得好好！麻煩你唔好再攞Auntie製造新聞，呢個係好嚴厲嘅忠告。」
梅啟明曾指希望梅媽「拍板」籌備整個婚禮，包括：日期、酒樓、出席嘉賓、食物菜單、流程等，因此公開呼籲梅媽和姪仔梅柏麟聯絡他，更聲言無論用任何方法都一定要梅媽現身。潘小文回應指若梅啟明堅持開記招就「自己搞飽佢」，直言梅媽不會出現，亦不會出錢，潘小文反問：「70歲人結咗三次婚，你知唔知醜？」強調梅媽沒錢幫梅啟明找數，「擺酒喺佢嘅事，用自己錢慢慢搣」，潘小文更直指梅媽對梅啟明死心，亦不想對方再騷擾自己的生活。
梅啟明指Joey諮詢等同申請離婚
梅媽早年接受潘小文訪問時，曾表示不信梅啟明聲稱兒子Richard患癌，直斥梅啟明不顧妻兒，當時她說：「仲四圍去住攬女人，以前佢都仲去做吓嘢，直至識到嗰啲女人更加無聊…幾十歲仲去搵女人搞搞震，（我）啲錢好辛苦㗎，阿梅啲錢（遺產）係用嚟做生活費㗎，唔係畀你拎出去玩女人！」Joey近日得知梅啟明準備再婚，大爆原來兩人未正式離婚，梅啟明卻指：「離婚嗰度梗係離，佢已經搞緊法律援助，搞離婚。」Joey表示只是去諮詢，並獲社工告知沒申請法援的資格，梅啟明竟然說：「佢去諮詢，即係申請啦。一早就離，冇喺埋一齊咁多年，五、六年咁耐。10號再講。」被指沒盡父親責任的梅啟明更聲言：「個仔我一定要」！
