現年已77歲的汪明荃近日忙於為演唱會宣傳，日前作客陳志雲YouTube頻道直播受訪，期間陳志雲提到汪明荃到中年時還在《京華春夢》演少女，質疑她阻年輕人上位，令汪明荃閃現愕然表情。
汪明荃日前接受陳志雲直播節目訪問，陳志雲問及汪明荃有否考慮退休，汪明荃表示：「老實講都唔係話冇嘅！有時攰得滯，啲工作重複太多會覺得悶，咁都會想停一陣，但停一陣好喇，唔會諗住停晒囉！」汪明荃續指：「我學咗咁多嘢，我如果唔做咪嘥晒！做咩嘥咁多時間去學啫？而且我想證明每一個年齡都可以做啲唔同嘅嘢。」
TVB鎮台之寶汪明荃現年已77歲，仍為粵劇界出心出力，間中為TVB大騷坐陣做司儀，近日更宣布將於11月舉行紅館演唱會，對演藝事業的熱誠令人佩服。
陳志雲這時讀出網民留言：「呢度（留言區）都有人話『哎呀，好心畀啲後生嘅做啦』。」汪明荃即反駁：「我冇阻住到佢哋喎！後生嘅又做唔到老㗎（長輩的工作）。」不過陳志雲舉女星黃曼梨作例子：「黃曼梨好後生就做阿婆。」汪明荃指：「係因為佢自己個樣生得老積穩重呀嘛！有啲（演老人）假到死，我會阻住邊個啫？唔會㗎！老嗰啲同我一齊老㗎啦！」
陳志雲問及汪明荃出演1980年劇集《京華春夢》時幾歲，汪明荃表示：「我諗都係40幾歲啦！（實為33歲）」陳志雲笑指：「你咪阻住囉！40幾歲做10幾歲！」汪明荃露出了半秒愕然表情，接着她表示：「咁40幾歲先啱啱學識做戲咋喎，你估而家真係港姐呀？18歲就做。」陳志雲都認同汪明荃說法，認為的確需要一些經歷才有助演戲，更指欣賞汪明荃指「你估而家真係港姐呀？18歲就做」。汪明荃表示現時太多年輕人入行經驗不足，「唔係咩？而家（入行）即刻叫佢哋做戲、做主持，你乜嘢都未學。」汪明荃認為經驗需時間累積，獲很多網民認同。
