現年42歲的莊韻澄（Xenia，前名：莊端兒）與「準前夫」呂成忠（Joe）連日來隔空互數對方不是，最近莊韻澄更自爆遭到呂成忠持續性騷擾同傷害，仲搵埋警察上門，令她大喊：「真係好恐怖！」
莊韻澄與呂成忠正在辦理離婚手續，最近莊韻澄卻忽然出po透露被呂成忠不斷要求開FaceTime及影相、拍片報告兒子的實時狀況，有日她因未有聽電話，以及電話過熱拍片拍到「疾疾吓」，結果約20多分鐘後警察就搵上門，她直言：「佢頭先仲喺我樓下呀！我同BB都好驚。」
莊韻澄又以影片形式公開兩人對話內容，呂成忠表示：「我用我可以保護BB安全方法」、「警員陪同下係（喺）樓下超過20分鐘」、「因為BB得3歲，怕佢一個人」、「最後BB位置時間不確定。我和警員溝通過才了解BB是否獨留家中」等，莊韻澄則寸爆他浪費警力：「差啲以為我失蹤20小時呀！」
之後莊韻澄再以與囝囝到公園玩的片段作背景，大呻：「我都好想可以放低電話專心湊仔，我唔明點解係都唔放過我！」又指自己每日都被呂成忠用不同名目騷擾：「都唔知仲要點先肯畀我抖抖，持續性嘅騷擾同傷害真係好恐怖！」更指呂成忠連她化個妝落街都要報警，令她無奈到極點！
最後莊韻澄發了一段黑底白字的長文，解釋自己點解唔block呂成忠，全文如下： 過去為咗小朋友我忍 邊個唔想俾個完整家庭小朋友 否則我就唔會忍咁耐啦 而家我都係為咗我小朋友要去克服去面對 好多人問我點解唔block佢 因為我只不過冇聽2個電話或者 30幾分鐘聯絡唔到我 啲人就會去報警囉 我而家就喺度講到明 我係會出去工作搵錢養家 我係會帶仔去玩去正常返學上堂同各種活動 見唔同朋友有正常社交 我都會自己同朋友見面食飯 而我唔喺我仔身邊嘅時候 一定會有工人姐姐同婆婆睇住 舅父舅母又會一齊幫手睇 基本上佢哋差唔多晚晚一齊陪我同BB食飯 BB真係好開心 而我屋企人真係好擔心我呀 不過我真係同大家講聲唔好意思 我好少放負… 我好想之後放多啲工作相 開心相同BB嘅相 我會加油！
不少網友都留言支持莊韻澄，狠批其準前夫呂成忠：「做男人做到咁真係好垃圾，小氣又死纏難打，仔已經唔洗你養，最多冇地方住啫」、「去到呢啲地步佢老公都係想攬炒架喇，睇下幾時啫」、「因為佢又得閒又嬲，有時遇到呢啲人，只可以等佢突然唔想玩你」等。
文章版權為新傳媒集團所擁有，原文請按： 网页链接
