73歲李龍基未婚妻王青霞（Chris）因被控逾期居留、使用虛假文書及違反逗留期間接受工作等共7宗罪被判入獄25個月，李龍基心情迅速平伏，連日來出席朋友的飯局，全程心情靚爆，自爆已經有女埋身的李龍基，直認外間有很多誘惑，所以會盡量忍。
李龍基日前為演唱會出席記者會，自從未婚妻王青霞（Chris）被判入獄25個月後，李龍基的一舉一動再度成為焦點，王青霞判刑當晚，李龍基已經出席友人聚會並為葉子楣補足農曆生日，當時全程心情勁靚，不過李龍基稱原來一切有苦衷，為免拒人於千里，才勉為其難答應出席，但他承認自己的敏感度不足。近日李龍基接受網台節目《葳言大意》訪問時，主持人問他「邊個愛邊個多啲」？李龍基坦言：「我感覺佢愛我多啲，當然我都愛佢啦，呢個我唔否認，因為整件事嘅發生就係因為佢太愛我，若然唔係，佢無需要忍受或接受呢啲痛苦經歷，因為佢想盡辦法要留喺我身邊，變咗做咗好多傻事。」
李龍基還自爆未婚妻寫了超過122封信給他，而他亦有回信：「我有寫，不過唔係寫太多，通常係寫一啲好鼓勵性嘅歌詞，例如『斜陽裡 氣魄更壯 斜陽落下 心中不必驚慌』，又或者『小小苦楚等於激勵』，老實講，其實諗深一層唔係乜嘢大不了，只不過喺裡面多咗時間去自我去檢討、自我去修正。」李龍基又稱最初預計未婚妻只判一年，但結果變作25個月：「呢個對我哋嘅打擊都好大，因為我哋唔係好很熟悉法律嘅嘢，只不過大家都係估猜，仲有律師好大膽分析畀我哋聽，大約係12個月左右，點知結果係雙倍，所以同個預期嘅反差好大。」李龍基續說：「唔緊喇，一年好快過，忍一下喇，佢忍時我又忍，不過當然我嘅忍更加需要努力。」李龍基直認外間有很多誘惑，所以會盡量忍。
曾有報道指投資有道的李龍基名下有7個物業，更有「深圳樓王」之稱，不過有指全部轉贈予王青霞，在訪問上，李龍基說：「其實我係窮光蛋嚟，因為我同前妻離婚，其實覺得對佢唔住，所以我係淨身出門完全畀晒佢，簽字離婚放棄晒啲嘢，係因為Chris，2019年嘅時候。」主持問李龍基有否想過王青霞是為了名或者利才一起？李龍基坦言：「我初初十幾年前識佢時有咁諗過，然後我唔想搞散個家庭，分開咗段時間，後嚟重逢就乾柴烈火重新喺埋一齊。我2018年喺美國重遇Chris，佢係好清楚我畀啲物業前妻，只係有少少現金積蓄傍身捱下。」李龍基更揚言：「我可以寫包單佢一定唔會變心，因為喺環境之下，唔可以令佢變心，佢喺香港無人無物得我一個，我食硬佢。」
李龍基續說：「至於我自己呢，我就要好努力，因為呢個真係花花世界，不過喺呢個時刻我亦都可以寫包單我唔會變，但老實講，呢個世界冇人可以講係絕對，大吉利是我聽日明天行出去，係唔知有乜嘢事，因為而家呢個世界真係太多變幻，有時候我唔想變，但係忽然間變，變咗去另一個國度，你最好的準備就是最壞的打算。」李龍基亦笑說：「有一位堪輿學家同我講，李龍基你識一個係細啲，再識一個又細啲，我話唔係呀，我呢個已經細我36年，唔通再嚟一個比我續細48年，唔好呱，所以我真係要盡力克服。」
另一方面，76歲何伯與年輕逾30年的內地女士火速搭上再閃婚後，何伯與五名子女為爭450萬反目，李龍基亦被拖落水，被連登仔大讚「係香港聰明仔代表！」李龍基的風頭亦被蓋過，李龍基坦言很少睇何伯的動態：「其實我處之泰然，我好淡，老實講我始終覺得係人哋兩個人嘅事，佢哋兩個最終好與唔好都同我哋無關，我哋都唔需要踩隻腳入去，令到人哋好或者令到人哋唔好，我自己嘢都未理掂，仲要理人？」明顯抱少理他人的心態看待何伯事件。
