單立文（豹哥）近年參演TVB處境劇《愛．回家之開心速遞》入屋，年初更一度入圍視帝最後五強，認真威水！單立文努力工作，大可以享少奶福的胡蓓蔚亦搞作多多，除了間中拍劇、主持，近來更常常分享唱歌片，未知是否想鋪路復出再做歌手。而最近胡蓓蔚不僅歌喉Fit爆，連身材都越來越Fit！
今日（4日）胡蓓蔚在IG晒出三點式泳照，疑似身處船上的她戴上帽及黑超擺Pose，胡蓓蔚雖然52歲，但腰間零贅肉，更隱約見到她操出馬甲線。胡蓓蔚更指「手機直出」，似乎想強調絕無P圖，更Hashtag「運動加儀器輔助」，借泳照來分享健身後的成果。其實胡蓓蔚與一班「胡說八道會」好姊妹一樣平時熱愛健身，雖然胡蓓蔚沒有如好友胡定欣一樣操出鋼條身形，但年過半百操出馬甲線亦絕非易事，胡定欣都留言Like爆：「真係FIT。」
胡蓓蔚如此好身材，當然亦有網民笑指羨慕單立文好福氣娶到索妻，但其實單立文與胡蓓蔚在性格上亦非常合襯，才令本來無意結婚的單立文最終走入婚姻。單立文與胡蓓蔚年差13歲，拍拖12年才決定結婚，今年是二人結婚16周年。單立文早前在節目《香港婚後事》中被問及曾否想過出軌，他表示：「如果你（結婚時）立咗誓，同佢講過我愛你一生一世，如果你做唔到嘅話，你根本就唔係男人，係咪呀？」單立文亦分享婚姻哲理：「婚姻係兩個人三唔識七喺埋一齊，之後產生一種化學作用叫愛情，之後到你 Commit 要照顧一生一世，講就易囉，當你途中遇到咁多嘢嗰陣，你個心會唔會動搖？會唔會想放棄？你要重拾正軌去鞏固番個婚姻，係好艱難，一段婚姻共富貴係好容易，共患難就唔容易。」單立文Man爆一面獲網民大讚是好男人。
胡蓓蔚亦在節目中分享早前夫妻吵架，令她學會對老公更溫柔：「最近我激親我老公，激到佢睇醫生，原本係好小事，但大家喺度互頂，佢話：『你收聲！』我話：『我好冷靜，你有咩資格叫我收聲，我做咩要收聲，我依家叫你收聲！』之後佢個胃就唔舒服，個肚好多氣，Gur 咗幾日，跟住佢去睇醫生，食咗兩個月胃藥。」胡蓓蔚表示自己性格向來直接及倔強，夫妻間需要互相遷就，才得相知相愛近30年。
