在2016年參選港姐而入行的「熊心如」蘇韻姿（Andrea）在上月宣布離開TVB後，從她的個人社交平台所見，蘇韻姿「脫無」後生活頗充實，獲邀當活動司儀外，她亦積極經營個人社交平台拍短片，相信向當KOL方向發展。
此外，蘇韻姿在劇集《愛·回家之開心速遞》飾演熊心如開補習社，在現實中她也當老師。
她接受訪問透露：「嚟緊會喺謝東閔同坤哥（吳業坤）開嗰間音樂學院教小朋友，係一個短暫嘅課程，之前都有試過幫小朋友補習，或者教小朋友唱英文歌，其實本身都好鍾意小朋友。都幾得意，心如現實又可以做一個老師，幾得意嘅體驗。」而課程將以全英語授課。
蘇韻姿續表示：「離開公司之後有好多嘢想嘗試，可能之前拍攝時間唔穩定，唔容許我可以做到呢啲嘢，始終教小朋友，每日要有穩定嘅時間，我想認真對待，唔想因為拍嘢而影響教班嘅進度。𠵱家係Perfect嘅Timing，本身好想做呢樣嘢，亦都鍾意同小朋友相處，𠵱家就可以嘗試。」
同時，她更有很多計劃，稱：「教育方面都係有興趣嘅，本身都有幫人補習過，嚟緊都有傾緊唔同嘅合作，稍後再宣布畀大家。演藝方面亦有其他嘗試，例如直播工作同拍攝工作，可以喺唔同嘅位有新嘗試同發展，呢種彈性都係我想追求嘅事。多謝大家留意同支持，希望我喺唔同嘅範疇發展會愈嚟愈好，亦希望大家見到我喺唔同嘅位置都可以做到發光發亮。」
不過有網民質疑她有何資格教唱歌，其實加拿大長大的蘇韻姿在小學時，於多倫多公立藝術學校 Claude Watson School學習文化及藝術課程，而在皇后大學主修戲劇副修音樂。
在2015年，她於加拿大新時代電視《星秀動全城 Vocalibre 2015》歌唱比賽中獲得亞軍。另外，在去年底，她還參與音樂劇《我們的青春日誌》演出。
