有「日本通」之稱旅遊達人周奕瑋（Jarvis）每日都主持節目《買大阪樓15識》，短短幾分鐘介紹日本大阪置業的情況，而周末亦有他跟黃翠如和C君（鄭詩君）主持的旅遊節目《Grand住去台北》，幾乎日日都見到他在電視機出現。正所謂近水樓台先得月，日日介紹大阪置業，冇理由唔心動嘅，Jarvis今日正式宣布首次榮升業主啦！
Jarvis在IG分享一篇長文，主題是「分享一個重大決定」，原來他拍節目期間已經對日本投資置業感興趣，最終原來已經低調簽約，成功「上車」做業主。內容如下：
呢排一直係咁思考好多，
終於喺啱啱，
我吸咗啖氣、
再的起心肝、
然後簽咗個名。
係簽買賣合約嘅名
各位，我做業主喇！
我喺大阪做業主喇！！
老實講，
我都俾自己呢個舉動嚇咗一跳，
因為今次係我人生第一次買樓，
仲要唔算諗咗好耐，就落呢個決定。
不過有時就係咁，
天時地利人和要來就來。
再加上……今時啲Yen真係好平，
而家買真係抵好多。
(所以應該叫「金時地利人和」、
或者「打鐵趁熱」。)
至於地利，
本身諗過幾個區，
心齋橋南船場嗰邊嘅文青區都係我心水，
但始終第一次買樓，Budget有限
最後我揀咗交通同生活方便嘅大阪西區一帶、大正駅附近。
嚟呢度嘅第一日，
就遇上個好靚嘅日落、
第二次去嗰陣仲睇埋河邊嘅滿開櫻花、
河邊又有好Chill 嘅餐廳、
的確係自己想要嘅環境。
話晒係一個ISFJ，
作為I 人，唔使做嘢嗰陣，
其實我真係好需要收埋自己，搵空間獨處。
最後選擇呢區嗰陣，我想像到，
喺呢個小社區舒舒服服散吓步，
靜靜地坐喺河邊聽歌、發呆嘅自己、
係啱我嘅。
而人和方面，
多謝今次 #買大阪樓15識 呢個節目。
FMI @fminvestment_hk 嘅Amous、Nicky，
重啟咗我埋藏咗好耐，對買日本樓嘅諗法。
以前有諗過，如果第時有錢喺日本買樓，我肯定揀咗東京先，因為話晒東京係我生活過嘅城市，係有種私心嘅。
但Amous 教識我買大阪樓最大優勢係投資做民宿，呢樣嘢係我從來無諗過嘅，令我多咗個投資嘅眼光睇本身熟悉嘅日本。
以前我只係會用工作／旅行嘅角度睇呢個地方，
對金錢嘅諗法亦比較保守，
凈係會諗住做住同一件事，努力做嘢儲錢。
但今次，算係跳出呢個固有諗法，
做演藝工作嘅同時，
都學吓搵啲被動收入。
話時話，無諗過連投資置業呢方面，
自己嘅選擇都係同日本有關
仲要多謝 Akina方健儀 @akinafong
本身真係諗住第時飛大阪，
就租佢間民宿住吓㗎咋〜
點知講講吓，
竟然變成買間俾自己去住。
呢段時間問咗Akina好多意見同經驗心得，
係咁煩住你唔好意思
嚟緊可能再煩你多啲，
因為我地做鄰居喇〜
不過老實講，
為咗做業主，
今次真係將儲咗好耐嘅身家拎出嚟
但係大個仔喇，
係時候俾自己試上一層樓
(真係字面嘅意思)
同埋都要諗吓搵啲被動收入嘅〜
所以嚟緊我會提自己慳啲錢、
再努力工作賺錢
出年收樓嗰陣，
就可以飛去住吓自己間屋喇
Wow~~
遲啲有機會再同大家分享多啲啦~
周奕瑋接受本網電話訪問，他表示：「其實我去拍嗰陣，住嗰陣都已經好心動，再加埋而家円真係平，所以決定買樓。層樓300呎，樓價係港幣七位數字頭，咁我就俾咗六位數字嘅首期，出年秋天收樓。之後預計都會放租出嚟做民宿，啲租金已經可以幫我供樓，所以其實都係一個可以負擔到嘅數，好彩平時自己個人好慳，所以都做咗10幾年嘢，儲到啲積蓄，今次可以出擊。畀完首期之後，一大半積蓄已經用咗，所以要繼續努力工作。」他表示今次投資都有計算好自己承擔範圍，加上性格保守，不是傾家蕩產不過都動上大部分積蓄。
