一如大部分香港人，我肥碌近年對一切電視節目，包括各式「大騷」，已失卻興趣。
每年唯一能令小弟擔定凳仔由頭睇到尾的，只有香港電影金像獎頒獎典禮。
原因？第一、我乃堅貞影迷兼本土片Die Hard Fans；第二、屆屆出現的人物，絕少在其他電視節目現身，經常有驚喜；三、幕後製作團隊雖全部義工，但年年絞盡腦汁炮製賞心悅目內容，次次精采；四、最重要，想第一時間知道自己貼中幾多獎項。
前晚又開定紅酒、買定外賣，與肥妹老婆齊齊由七點半踩到尾。
仍然賞心悅目，極好看。
不過，好看還好看，大家當然仍會七嘴八舌批評獎項得主是否實至名歸。
我與一眾影癡老友的結論—唔服！
先旨聲明，大家個個佩服今時今日仍肯投資天文數字拍電影的老闆，因實在風險太大，與收益絕對不成正比。另外，香港觀眾，有哪個不是梁朝偉粉絲？佢毫無疑問是個殿堂級演員。
不過．．．．．．不過乜？不過，《金手指》那有理由橫掃六項大獎？此片整個幕後團隊非常用心，人人看得出，但資深觀眾欣賞時，必感到導演及編劇，有極大心理負擔，野心勁高同時卻處處受制肘，搞到瓣瓣皆neither here nor there，不少場面力不從心，唔湯唔水！
而梁朝偉演出，亦未能由始至終有自然演繹，個別場面更略嫌浮誇。
結論就是，《金手指》得到不配的榮譽，唔服！
撰文 : 曾智華 肥碌出馬
