第42屆香港電影金像獎頒獎典禮在昨晚（4月14日）圓滿舉行，入行逾60年的「大哥大」洪金寶獲金像獎頒終身成就獎。大哥大在領獎在台上誠懇地稱：「一個人在同一個職業做60年，又做得好，真的好有福。」
洪金寶表示，覺得身邊有很多貴人支持，因此這個獎不是自己一個人的榮耀。他表示第一位是陳佩華，稱：「我第一部做導演，佢做我製片，之後佢都係我電影嘅製片，所有上上下下嘅事，佢幫我搞掂，唔使我煩惱，可以專心拍戲。」
然後，大哥大感謝多年來工作的手足，稱：「第二係我最佳拍檔編劇黃炳耀，同埋司徒卓漢先生。跟住多謝洪家班，佢哋真係勇字當頭，冇一樣嘢話唔得。另外要多謝前妻，幫我生咗4個好乖嘅仔女。」
接着他看住坐在台下的太太高麗虹，笑著說：「當然要多謝依家個老婆，照顧咗我40幾年，依家唔畀我食呢樣嗰樣，又帶我睇專家，佢夠耐性。」高麗虹甜笑並向丈夫派心及舉起大拇指。
大哥大在後台接受訪問稱：「梗係開心啦，當知道有呢知獎頒畀我，係驚喜，上年亞洲電影大獎後，諗住可以收皮，仲有金像獎係驚喜嚟。」他又指曾執導過200部電影：「竟然未拎過最佳導演，想再拍多十零部。」更不失一向幽默說：「已經拍完，喺夢入面。」
然後洪金寶認真稱：「其實我想拍《五福星》，不過有啲已經走咗，拍出嚟係想人開心，佢哋係壞人，但係好嘅壞人。」雖然曾計劃搵年輕人拍新版：「但邊個會去睇丫？電影要培養新人，要一步一步嚟，要好多心機，都要講實際。」
他說最近諗得最多是諗食嘢：「因為太太唔畀食！依家最想食大鹵麵，去京菜館就知，我師父係北方人，我都習慣咗食北方嘢，以前一個星期可以食4次。依家腦海中成日回憶餐蛋味，3年冇見過喇。」
高麗虹細心照顧丈夫，堪稱一百分太太，她與大哥大沒有子女，不過高麗虹視洪金寶與前妻所生的子女洪天明、洪天祥、洪天照及洪煦榆如己出，與繼子繼女關係良好。而且持家有道，一直悉心照顧丈夫洪金寶。
當年洪金寶與韓籍前妻曹恩玉在韓國認識，據知當年大哥大在韓國工作時，由曹恩玉負責接待，可是有天她陪大哥大到酒店辦理登記時，酒店員工卻要求曹恩玉證明身份才可入住，否則離開，於是洪金寶一氣之上便說曹恩玉就是他太太，於是翌日二人註冊結婚。
但二人婚後經常吵架，結果這段婚姻在1994年結束。而曹恩玉生活低調，不過好與一些娛圈中人如姜大衛夫婦、曾當藝人的王玉環為朋友，不時聚會。
