藝人林峯與好兄弟吳卓羲為無綫節目《Mayanne小喇叭》任嘉賓，大談相識25年的經過，二人同聲表示除了每日必定聯絡對方，更經常互到對方家中過夜，感情猶如親人。原來當年是林峯主動向卓羲伸出友誼之手約食飯，卓羲直言當時也嚇一跳：「佢打畀我嗰陣時我都打咗個凸，嗰時佢已經《尋秦記》，佢話約我食飯，我就覺得咁奇怪嘅？然後就一步步建立關係。」林峯亦大方向卓羲發表愛的宣言：「鍾意你吖嘛！」
而二人更應要求翻看當年拍攝《大唐雙龍傳》時經典露股一幕，卓羲爆料指是當時臨場應導演要求進行拍攝：「初初劇本冇，佢哋話不如整場令伍姑娘(伍詠薇)尷尬少少嘅戲，導演就提議除晒，我問出唔出得街，除冇問題，我哋咁嘅資質，但點樣遮住前面先？」林峯亦表示：「現場有啲大垃圾膠袋，我哋就剪咗個角落頭落嚟!」卓羲也附和說：「我望住佢剪幾大，我咪再剪大啲，鬥大囉！重點係我哋用牛皮膠紙黐。」林峯大表認同：「黐嗰陣冇問題，搣嗰時大鑊。」說得興起的卓羲還大爆搣膠紙時苦況：「要搵𠝹刀𠝹毛，我哋互幫大家，現場冇人夠膽幫我哋𠝹！」
