做阿太可能係好多女人嘅終生夢想，但係咪只有風光嘅表面就夠一世滿足？高EQ如「純純」都有頂唔順嘅時候，佢嫁到呢個門口，都經過「老爺」嚴厲審核，好彩當日真係讀到吓書，喺娛樂圈又唔係撈咗好耐，附合「老爺」嘅乾淨標準。
「純純」同「少爺」都係真心相愛，當日為咗得到「老爺」信任，「少爺」對「純純」多少有機心，搵個老竇鍾意嘅女人，方便日後分身家。「純純」後生又可愛，「少爺」未試過好有新鮮感，兩個人拍拖都好純愛，淨係啲保鏢喺身邊團團轉，不過「純純」都好高招，搵咗個相熟好友唔覺意咁將戀情曝光。
因為佢諗住咁樣對自己有利，就算真係嫁唔入豪門，身價都非一般，點知「老爺」鬼咁高興，結果順水推舟即刻入門，做咗人生勝利組嘅典範。問題係呢個世界有辣有唔辣，娶你返屋企唔代表要特別善待，既然成個屋企有「純純」一世都用唔完嘅錢，「少爺」始終唔改佢定時定候溝新女嘅習慣，「純純」頂唔順就會同「老爺」攤牌，老人家但求頭家安靜唔好散，通常都即刻送好多大禮畀新抱，呢十年「純純」收收埋埋真係唔簡單㗎，就嚟成為城中女首富啦！
