藝人李龍基今日（21日）急急返港，趕往懲教所探望涉嫌兩度違反逗留條件以及有關兩間學府的虛假文書等合共6宗罪、現還押中的未婚妻Chris（王青霞）。李龍基為見未婚妻盡最後努力，行程一改再改，除撲車票由廣州搭今早的直通車趕返港外，今早又收到懲教署通知要12時前趕往大欖懲教署辦理核實身份手續，以便盡快和未婚妻見面。
李龍基拖着行李甫現身，即被大批等侯的傳媒圍實，被問到有否有Chris購買日用品，他表示未有，當問到他有否接獲入境處調查，李龍基表示：「冇收到。（如果Chris被遣返咁點算？）都冇計，要接受現實，（眼泛淚光）Chris屋企人仲未知佢出事…」語畢便急急離開。
約早上11時許，李龍基抵達大欖懲教署，他甫下車即爆喊見人，以手巾仔抹面，並寫字登記進入懲教署。李龍基向傳媒表示，自己已經攝太歲，流年不利，本身他打算今日下午4、5時才回港，收到懲教署指Chris需要日用品，他即急急改車票返港：「我有留意Chris嘅案情，我估唔到咁大鑊，我以為佢只係過期居留好小事，完全唔知佢啲證書原來係偽造，亦都未見過佢任何嘅證書……Chris平時講咩我都會信，作為未婚夫，如果我咩都唔信、乜都Check住，係好唔畀面佢，所以佢講咩我都會選擇去信佢。」李龍基再次強調未有嬲Chris，只係嬲未婚妻乜都唔同自己商量。
他駕車到大欖懲教所探望未婚妻王青霞（Chris），據知他只有15分鐘探望時間，李龍基探望完未婚妻後離開時受訪，他稱入到去見Chris，第一時間安慰她不要擔心，應承待她出來一定迎娶她做老婆：「我同佢講唔好理外界講乜，因為我知佢係真心嘅，相信Chris經過咁大教訓，一定會變番好，有咩都會搵我商量，佢都有同我道歉，佢覺得好似累咗我，佢絕對唔係為咗錢同我一齊，嗰7層樓喺我前妻名下，所以我係冇樓，現金都唔多，Chris喺呢個情況之下都肯同我一齊，證明佢覺得我係Right man。」對於Chris之前曾在美國訂過婚一事，李龍基表示也認識她的前度，指Chris與前度貎合神離，性格不合，力證Chris跟前男友分手後，才與他一起，絕非一腳踏兩船。
提到Chris被控6宗罪，李龍基表示勝算好微：「不過嗰張飛行證書Chris都係畀人呃，Chris係真金白銀攞錢出來學揸飛機，唔知證書係偽造。（會告對方？）佢已經潛咗水搵唔到人。」李龍基表示會為未婚妻力爭保釋，表示自己工作照常，遲些還要去日本拍戲。對Chris被網民批為大話情人，李龍基表示仍然選擇相信女友：「我唔會再深究，作為未婚夫，相信可以改變Chris。」至於Chris曾自稱自己是經優才計劃來港一事，李亦堅信女友曾經申請：「我估可能疫情期間，Chris想留喺我身邊長啲，才用啲旁門左道逗留香港，Chris之前拒絕過我幾次去美加開騷，我都不以為意。」他指網上有好多人對女友作出針對性攻擊，不排除今次是有人舉報：「我唔明啲人點解咁妒忌Chris，暫時唔會通知女友家人，會將案件交律師負責。（寫求情信？）會，會搵圈中人寫，希望法官可網開一面。」
