藝人陳瀅與周嘉洛今早出席好友JW新店開張，惟兩人姍姍來遲，先是陳瀅擺大烏龍「遊車河」去錯地方：「我去咗上環店，JW係有派帖我嘅，係我疏忽冇睇到，所以真係唔好意思，我會買番1千杯飲料補數㗎嘞。」
她又主動向記者表示「好耐冇見大家」，原以為她返回加拿大一段時間，想不到她眼濕濕表示：「我返咗去兩個禮拜啫，唔出嚟係因為我隻愛犬Diesel過咗身，我難過咗好一段時間，成個月暱喺屋企冇出街。（已經處理晒後事？）係，不過我真係好唔捨得佢，係一個好大嘅經歷同打擊，佢嘅離開令我反思人生，唔會再咁介意人哋嘅眼光，同埋冇咁執着小問題，懂得點樣再去分配自己嘅時間。」
