人稱「鬼才藝人」的鄧智堅，最近在劇集《新聞女王》中，飾演SNK的新聞總監「飛爺」一角，其輸打贏要、笑裏藏刀、卸肩有咁卸得咁卸的演繹，令不少打工仔看得咬牙切齒，不禁想狠狠揪打這位無能的上司。
長得一臉童顏的鄧智堅，怎樣將「飛爺」這條「老油條」駕馭得淋漓盡致呢？拍攝前，他確實下了不少功夫。其實，在演藝界打滾近20年，他的宗旨是「非演員（的工作）不做！」面對「演員」兩個字，鄧智堅可以毫無底線，疫情時，他甘願做連一句對白都沒有的臨時演員。為了實現自己的理想，曾經戶口剩下兩位數。為了做演員，鄧智堅可以去得有幾盡？由他自己娓娓道來。
現年41歲的鄧智堅（Eric），因為一個「窮」字，展開了他的演藝生涯。小時候住公屋的他，因為沒有錢買玩具，於是經常自己一個人在家一人分飾幾角，演繹一套卡通片來自娛，他哈哈大笑說：「都係因為窮，資源有限，所以我自己同自己玩角色扮演，咁咪唔使用錢囉。我記得當年我着嘅衫同埋玩具，都係攞人哋嘅二手，到出嚟做嘢，我就買咗部遊戲機俾自己。其實，我本身係唔鍾意打機，都只係彌補我細個冇玩具玩啫。」當年，家人見到小時候的Eric，成日自言自語，曾經一度懷疑他有社交障礙。
擅長創作獨腳戲的Eric，曾自編自導自演的舞台劇作品逾80部，例如：《潮性辦公室》、《拚死為出位》、《陳耀德與陳列室》、《獨座婚姻介紹所》、《仲夏夜之夢》、《離家出狗》等，都大獲好評！2014年，他跟陳慧心合作的舞台劇《女煮人（加辣版）VS 聊Dry男》，飾演宅男、毒男、港男等多個角色，更令他走上舞台劇的巔峰，他回憶說：「《聊Dry男》係我好鍾意嘅作品，當年加拿大有人邀請我過去演出，散場嘅時候有好多觀眾行埋嚟同我講：『我係因為睇完《潮性辦公室》，覺得你做得好好，知道你過嚟做演出，我就立即買飛。』聽到呢啲說話，我真係得到好多鼓舞。」
100蚊都冇
2008年，Eric得到詹瑞文同甄詠蓓的賞識，羅致加盟PIP劇場做全職演員，同一年他亦獲得香港戲劇協會頒發傑出年青演員獎。接着，他因為太心急創立自己的劇團，於是陷入經濟拮据，Eric無奈的說：「因為離開咗PIP劇場，就冇咗月薪，又太心急成立自己嘅劇團，曾經戶口銀碼只剩兩位數，連100蚊都攞唔到，因為要交租、食飯，最後我都係要問朋友借錢。由於我借嘅數目實在太細，啲朋友都忍唔住問：『你借咁少夠唔夠用㗎？』嗰時，我真係乜嘢都肯做，包括：街坊表演、社區巡迴演出，總算夠還錢俾朋友，呢段日子真係我人生嘅最低潮！」
之後，Eric又拼命儲下了6位數字，於是再搞劇團，但因為一個錯誤決定，全部輸光，他慨嘆道：「真係一個好大嘅教訓，我就係衰在太心急，當時有人放咗個期出嚟，我完全冇諗過位置適唔適合？嗰個時間係唔係有觀眾想睇？冇考慮呢啲因素，經過呢一件事，𠵱家嘅我，做呢啲嘢梗係搵投資者啦！兼且會權衡商業與藝術。」
為了擴大自己平台，於2017年，Eric開始轉戰電視圈。當時，他為自己定下了一個5年的目標，怎料卻遇上疫症，所有工作停頓，每個月只能夠賺到兩、三千，但都要頂硬上，他坦言：「當時所有工作都停頓晒，我就當自己離開一下工作，陪伴一下屋企人。不過想陪伴，其實都唔係咁容易，因為大廈全封，冇得出街。當時，我嘅歲數由3字轉4字頭，我問自己，仲邊度有咁多時間浪費？冇劇開，公司叫我做臨記，飾演茶客、搬運工人、冇對白嘅毒販，我都做。好彩，我set咗5年期限，真係第5年就俾我遇到《下流上車族》，第6年我仲攞到最佳男配角添！」
教導娜姐
其實，Eric能夠獲獎絕非僥倖，最近他在劇集《新聞女王》中飾演「卸膊王」新聞總監「飛爺」一角，就得到莫大迴響。不過，他生得細細粒，又有一張童顏，難以令觀眾信服他是一條「老油條」。於是，他便在臉上加二撇雞、一副圓形眼鏡，再染髮，以及穿着老成的大衣，造型似足《律政強人》中的廖啟智，這樣才壓得住場。
多年來，Eric都甚少提及自己的感情事，提到另一半，他立即面紅耳赤：「我係演員，唔講感情啦！不過作為一個演員，愛情經歷好重要，當年我演藝學院畢業，個阿Sir都叫我多啲拍拖，因為當時的我，只有puppy love嘅經驗，做戲一定要有愛情經歷！其實咁多年嚟所有嘅愛情經歷，我都試過晒，包括：三角戀、俾人飛、飛人、暗戀、異地戀、地下情，你噏得出嘅經歷我都有，所以之前同譚嘉儀喺《虛擬情人》（未播出），飾演兩公婆，手到拿來，呢啲就係我嘅愛情經歷累積番嚟。」
堪稱演藝界全能者的Eric，一人擁有7大身份，包括：導演、編劇、配音員、演員、專欄作家、戲劇導師、劇團創辦人，可謂斜槓族的佼佼者。當中最為行內人稱許的身份，肯定是戲劇導師，所以他桃李滿門，周秀娜、梁釗峰、Super Girls等也是他的學生，他笑言：「唔敢當，啲學生都好叻㗎，個個都有自己嘅特質，好似周秀娜咁，啱啱入行佢係我學生，佢第一日過嚟上堂，我真係認佢唔到，當其時佢冇化妝，樣子好清純，好樸素，佢上堂真係好投入，瞓身演出。鏡頭前同鏡頭下嘅佢，真係好大反差。當蝦頭知道我收咗呢個學生，佢好緊張咁走過嚟同我講：『嘩！周秀娜過嚟跟你學嘢呀，佢咪就係中環爆衫嗰個囉！』𠵱家佢獨當一面，我真係好開心！」
