森美和馮盈盈昨晚（21/12）現身將軍澳電視城出席《Home即是識》節目錄影。身為一Home之主的森美，受訪時笑言自己捱得、抹得、砌得，樣樣都得，簡直是十大成功男人典範：「因為我會砌完枱之後，我又會砌櫈，講真我砌嘢都好叻㗎。講開我哋做男人，真係少一個功能都真係爭啲㗎，就好似我以前追我女朋友返嚟嘅時候，佢媽媽鍾意，係因為我上去女朋友屋企換燈，同埋幫佢油咗塊牆，咁當時佢媽咪對我印象非常之好，佢認為可以交個女畀我。咁所以唔係話喺麻雀枱上先搵到好女婿，家居上都可以搵到好女婿，而家呢個老婆就係當時嗰個女朋友嚟。」
盈盈接着說：「好甜蜜，最後修成正果。家居上嘅嘢，我就冇森美咁叻，咁多功能，但我主要就係喺營養學上。但凡屋企要維修，安裝、電器嘅嘢，我就會交畀我爸爸去處理，而家居清潔方面，我都會負責，因為我都好鍾意乾淨同整齊。」
