大美人「蓮花」嘅前夫「身痕」，雖然係圈外人，但佢一向同唔少圈中人friend過打band，而平時佢份人又鍾意高調，得閒又會出嚟博吓見報，感覺佢都幾鍾意出風頭。
早前，東姑就聽到啲教徒朋友講，有鋪搶fo癮嘅「身痕」，甚至搶到返教會。有次，教堂重建籌募捐款，佢就被邀請上台做呼籲；之但係，估都估唔到，佢當正自己「棟篤笑」solo。
上到台，「身痕」首先出奇不意咁拎個銀包出嚟，大大力拍落張枱度，搞到成班教友都畀佢嚇到個心離一離。之後，佢繼續語不驚人誓不休，再喺銀包度攞咗張一千蚊紙出嚟，當眾就撕爛張銀紙。而佢嘅解釋就係，呢個世界冇免費午餐，呼籲大家捐錢畀教會喎！
事實上，「身痕」嘅無厘頭行徑，搞到成班教友都「黑人問號」抓爆頭。事後，大家私下討論佢嘅行為過激之餘，仲覺得佢撕爛成千蚊嘥錢，不如捐畀教會好過啦！
另外，亦有教友爆「身痕」平時返親教會，都好鍾意突出自己，每次星期日嘅主日崇拜，佢偏偏要姍姍來遲，跟住由最後排行去最前一排坐，搞到成間教堂嘅人都望住佢，當正自己係大人物咁款。
當年，「蓮花」毅然決定離婚，即使「身痕」扭盡六壬箍煲都冇用，唔知同佢啲騎呢行為有冇關係呢？
娛圈至八聯盟嘅盟主東姑
