影帝梁朝偉本月初憑電影《無名》…

影帝梁朝偉本月初憑電影《無名》贏得第36屆中國電影金雞獎最佳男主角，成為華語電影史上首位大滿貫「三金影帝」（香港金像獎、台灣金馬獎以及中國金雞獎），威盡全國！事隔兩周，網上忽然流出一段佢於金雞獎當晚嘅後台片段，只見佢當時喺眾人簇擁下緩緩走入房間，右手攞住金雞獎尾部，搞到獎座上下調轉、金雞頭部朝地，豈料梁朝偉此舉就觸動部份網友神經，有網友留言表示咁樣攞獎座唔得體、唔夠尊重：「我覺得這有點不尊重！最起碼拿的正正方方 拿到這感覺像是無所謂」、「像拎個錘子」、「好像拎了一只燒雞準備回家喝酒」不過亦有網友表示梁朝偉係憑實力攞獎，對業界態度及成績有目共睹，唔應該單憑一條片而定生死。