有爸的孩子像個寶。賭王何鴻燊的四…

有爸的孩子像個寶。賭王何鴻燊的四房兒子何猷君，上周日（10月22日）被發現帶着寶貝仔何廣燊（Ronaldo），到上海迪士尼樂園慶祝4歲生日。
當日猷君的超模老婆奚夢瑤和2歲囡囡Romee都有同行，連媽媽梁安琪也有會合他們食飯、睇煙花。小朋友出名是「電力兔」，但猷君幾乎全日親力親為湊仔，陪玩陪笑，又抱又拖，更推着大大架BB車。他寧可自己辛苦，也要享受每分鐘的親子時光，這種絕世好爸，去邊度搵？
何猷君身兼湖北省政協委員和澳門電競總會會長，周身唔得閒，但金叵羅Ronaldo生日，當然要好好慶祝一下。上月22日，他和太太奚夢瑤帶着一對子女，以及目測兩名工人姐姐到上海迪士尼玩。一入園，便有兩、三名工作人員招待。
猷君拖着Ronaldo周圍行，又買氣球逗一對子女開心。當對仔女突然「斷電」，猷君就出動親子抱，或者讓他們坐雙座位BB車，實行自己的子女自己湊，沒有過分倚賴工人姐姐。
排隊期間，「小飛象」發生故障要暫停，猷君就抱住Ronaldo耐心等待，間中摸頭仔，父愛爆棚。遊戲重開後，兩父子即刻連玩兩次，奚夢瑤就陪囡囡Romee玩完一次後，站在外面向猷君父子揮手，一家四口幸福滿瀉。據目擊網友透露：「兩公婆都對孩子很好，Ronaldo比同齡的孩子高，遺傳了長腿媽媽的基因。」
四太梁安琪亦錫孫錫到燶，前一晚才在旺角麥花臣睇龍婷演唱會，翌日就飛去上海，會合猷君一家到樂園城堡內的皇家宴會廳食晚飯，再直落睇煙花。猷君為了讓子女盡興，由朝到晚出動臂力，行足過萬步都沒有怨言，認真抵讚。