入行接近三十年嘅「燥底王」，早年北上內地發展，直至近呢一兩年，幕前演出買少見少，喺香港近乎絕迹。雖然佢不時放聲氣，「抓撈」想返大台拍劇，但高層冇人騷佢，皆因佢份人狂躁難服侍，台前幕後都怕咗佢！
好似之前佢幫大台拍一套古裝劇，同選美出身嘅「水擘擘」有唔少對手戲。東姑聽聞，佢就成日恃強凌弱，經常明恰嗰時剛出道仲係新人嘅「水擘擘」。
話說「水擘擘」嗰時初嘗拍劇滋味，經常甩碌NG在所難免；不過，咁唔好彩撞正同「燥底王」合作，認真慘慘豬！唔只畀佢當眾鬧，仲要睇佢面色做人，不時仲要硬食佢啲有骨嘅說話，搞到「水擘擘」無地自容。
有一次，「水擘擘」狂食螺絲勁NG，「燥底王」就即刻火都嚟，仲大鬧錄影廠，發晒爛渣話選美出身嘅人，不如拍番旅遊節目，唔好再嚟拍劇搞搞震。
又有一次，拍得好哋哋，「燥底王」都要畀說話人聽，知道「水擘擘」喺加拿大返港，就話自己識好多加拿大嘅朋友，但係冇一個好似「水擘擘」咁冇記性。其實，全心揶揄對方背唔熟劇本，又經常走錯位，NG累佢遲收工囉。
即使，可憐嘅「水擘擘」都自覺唔好意思，猛同大家「耍冧」，仲經常「萬歲」請大家飲嘢，不過「燥底王」依然咬住佢唔放，繼續追擊擺明寸「水擘擘」話：「你唔好請飲嘢，要請食飯，次次畀你搞到遲收工，連飯都冇得食呀！」
難怪，以「燥底王」呢種脾性，之前積累太多「牙齒印」，o依家「抓撈」，自然係冇人睬。
