藝人方力申今日（14日）出席鼓樂音樂節，見他拿起鼓棍Po拍照，但就未有擊鼓，他笑言自己不懂打鼓，不想班門弄斧：「我覺得打鼓係幾好嘅，可以發洩情緒，同埋好啱小朋友學，因為小朋友手指未夠靈活，打鼓比學其他樂器易掌握。」
他表示近期正密鑼緊鼓為11月公演、首次擔正主演的舞台劇《相約星期二》作排練，坦言心情緊張：「上台唱歌都會唔記得歌詞啦，今次要講兩個幾鐘嘅對白，我到依家都未背熟，以前試過做舞台劇不過得20幾句對白。」他形容今次是人生一大挑戰，但最重要有大信心，又指首場已有朋友表示會入場支持，笑指或考慮叫他們觀看綵排當睇咗，減少演出壓力，不過女友葉萱（Maple）則會捧場。他笑言近日已減少不必要約會，一有時間便會拿劇本出來背，問到女友有否幫他對台詞？他説：「都有嘅，因為太多台詞。（有冇交埋戲？）咁又冇，交埋戲真係要好耐。」雖然分秒必爭，但他亦會錫住女友，未至於無時無刻練習：「始終都要有啲Quality Time，如果唔係會畀人投訴㗎。」
