無綫小花林穎彤（Bella）與捲入JPEX案被捕的藝人鄭雋熹早前因涉阻礙公職人員及在公眾地方作出擾亂秩序的行為兩罪，一同被捕及落案控告，案件今日（6日）在粉嶺法院審理。約早上9時10分左右，林穎彤到達法院她身穿白色短身上衣及黑色長褲，見她神情輕鬆，並企定定讓記者影相。相隔5分鐘，同樣身穿白Tee黑褲的鄭雋熹抵達，他應傳媒要求停低影相，不過問到心情如何時，他即表示要趕入法院。
控方要求將案件延後以便進一步調查，辯方同意，而保釋條件不變，案件將於11月17日再審。
兩人約於11時左右前後腳離開，Bella受訪時談到心情，她表示心情OK，至於控後把案件延期會否感鬆口氣？她說：「照佢哋意思，我哋都同意押後。（會唔會因為喺社交網發文，令佢哋認真調查？）唔會特別咁諗，唔會去猜測佢哋個意思。（擔唔擔心發文被指妨礙司法公正？）我問過法律團隊意見。（無綫有冇就今次事件搵你？）冇好詳細傾過，會同經理人傾，聯絡住公司。」至於對於今次案件會否感無奈？她稱自己是單親家庭長大，深明母女情，當見到不公義會伸出援手，問到最初如何接觸到案件中的母女？她以別人私隱為由，不便透露。
另外，提到有指她與鄭雋熹是情侶關係，她否認：「係朋友，好朋友。（話佢用你個名向圈中人埋手拍JPEX？）關於咁敏感，係另一單案，我唔評論，我同另一間公司我係冇關係。冇執法人員聯絡我，都冇擔心捲入事件，同我個聲名講嘅一樣清者自清，問心無愧。（你知唔知鄭雋熹有做開加密貨幣投資？）交畀佢答。」至於見她手拿名牌袋，問她會否怕被指忽然富貴？她說：「我童星入行，做咗十幾年嘢。（近年經常晒名牌袋？）唔係咁樣，我有去食車仔麵。（唔怕話你同鄭雋熹有關所以咁富貴？）佢哋要誤會同點評價我都冇辦法。」
至於鄭雋熹，佢離開時稱兩單案仍在調查中，所以不便透露，但相信時間會證明，問到心情，他說：「冇瞓唔到，心情OK。（無綫有冇搵你？）呢個唔回應。（同Bella拍拖？）係好好朋友。」
今年8月2日，鄭雋熹、林穎彤及另外1男2女等，一行6人到醫院欲探望一宗虐兒案中女童，惟女童有保護兒童及青少年命令，社署社工及醫生遂拒絕要求，因此雙方產生爭議，最終執法人員以涉嫌公眾地方行為不檢拘捕鄭雋熹和林穎彤等6人，其後被控「阻礙公職人員」及「在公眾地方作出擾亂秩序的行為」兩罪，已於8月4日於屯門法院提堂，延至今日再訊。
另，鄭雋熹於本月4日涉捲JPEX案被捕，並戴上黑色頭套帶到元朗南坑村助查。
