「家中的他如領袖，幾多心思難猜透⋯⋯」
是王馨平的新曲〈威嚴背後〉的歌詞，即將舉行演唱會的她，憑歌寄意，抒發對亡父「獨臂刀」王羽的愛。
「爹哋係一個好傳統嘅中國男人，唔擅長去表達自己嘅愛，好似我做歌手，佢從來都冇讚過我，我要喺唔同嘅人口中，先知道佢好着緊我。
「有個餐應老闆，係爹哋嘅朋友，佢話我爹哋喺餐廳見到我嘅Poster，就問個朋友拎咗幾張，仲好珍貴咁捲起，攞返屋企。」
最心痛除了是愛得太遲，54歲的王馨平，還要面對擊不倒的對手—疫情。
「爹哋都病咗好耐，疫情前我每一個月，都會去台北望一望佢，但疫情嚴重，全世界Lockdown，連當面見都見唔到⋯⋯就算事隔一年（亡父離世），我一諗到自己好多嘢冇講出嚟，想講嘅時候，爹哋已經瞓喺病牀⋯⋯呢個傷痛，唔會走得出，但都要Live with it！人生係咁㗎啦！」
王馨平的愛，從未缺席，未能親口向父親說出來，成了她人生鮮有的遺憾。
「懷內盛滿愛，未能開口，不等於沒有⋯⋯」
同樣是王馨平新曲的歌詞，也是過來人在訴說，愛要及時。
心情分享
以父女情為主題的新曲，跟即將於9月舉行的演唱會《王馨平女人馨情演唱會2023》，同樣是她籌備經年的「習作」。
「2017年，我喺上海開咗兩場演唱會，一樣叫《女人馨情》，本來嘅計劃，係上海站之後再做香港站。但籌備之後就遇上疫情，於是就等到今年。
「演唱會叫『馨情』，除咗係王馨平嘅『馨』，喺國語仲有『女人心情』嘅意思。𠵱家以我嘅人生經歷，都幾有資格同大家分享吓心情、生活同諗法。」
為了演唱會，王馨平時隔五年推出非翻唱的新曲〈威嚴背後〉，「由伍仲衡（製作人）未紅之前，我就開始搵佢做歌，歌詞寫父女情，但就係因為疫情，所以一直都冇錄音，到落實開演唱會，我再打俾佢，等佢有期先錄到音。」
新曲是王馨平給亡父王羽的情書，要憑歌寄意，也是因為疫情，令她未能及時到台北，見父親的最後一面。
說到痛處，她不禁淚流披面。「唉⋯⋯都幾遺憾（拭淚），爹哋已經病咗6年幾，雖然我哋都有心理準備，但佢都好堅強，到去年3月底、4月頭，醫生再話唔得嘞。當時唔係日日有機飛台北，去到仲要隔離11日，到我搵到機票，都要4月7、8號先有飛機。
「但4月4號晚，我妹用視像電話，俾我同爹哋見面。當時爹哋已經好虛弱，但都好想擘大眼，去望電話入面嘅我（哽咽），我感覺到佢見到我⋯⋯我冇同佢Say good-bye，只係（豎起拇指）同佢講：『你好叻！你好叻！』。」
當時王家三姊妹，只有二妹王加露在台，王馨平跟三妹王美怡也未能趕及赴台。「係一個遺憾，因為冇辦法親身見到佢（拭淚），唉！但係又有咩辦法呢？呢個就係人生啩。」
忠於自己
問王馨平可會想有時光機，或一些超級能力時，她秒答：「我冇諗過喎，我都唔諗啲無謂嘢嘅，諗嚟都冇用。我做人要忠於自己，跟住個心去做事。」
實際地隨心而活，2011年她開始接觸瑜伽，還於2016年考得瑜伽導師資格，現在每周也有4天要授課，令她活得健康。
「做瑜伽老師，令我嘅生活習慣好健康，每日好早起身練習，練習完或者上完堂，我先再去教學生，都幾有使命感。
「就算係疫情期間，我都唔係原地踏步。做直播教瑜伽，都學到好多嘢，先要喺屋企搵個靚嘅Angle；我人高，又要研究吓個電話要擺咩位，可以見晒我成個人。」
笑指她是美魔女代表，王馨平則稱，飲食上並無講究保養，「我好鍾意食嘢，係美食主義者，又鍾意飲酒，唔係豪飲，而係同朋友食飯，美食配上適合嘅靚酒，就更加開心。」
不過，對於保養，她還是有底線，「𠵱家同廿幾歲最嬌嫩嘅時候，一定係有分別嘅，但最緊要，我係鍾意自然，唔想搞到好膠咁嘅樣。𠵱家有一啲做Facial咁嘅醫學美容，我係接受嘅，唔係侵入性嘅，我都會去試吓。」
100分老公
「帶眼識人」，從來都是長輩的忠告，而王馨平，就不用時刻銘記這四個字。
因為：「我覺得我嘅直覺，一直都幾啱嘅！好似睇人、揀人做朋友，通常我都唔會睇錯嘅！」
最啱用，首推其丈夫李家輝（Stephen），「我哋係相睇識嘅，佢同佢爹哋、媽咪；我同我嫲嫲、姑姐，一齊食飯。我睇咗佢一眼，就覺得，係佢嘞喎。到啲長輩製造機會，俾佢送我返屋企，當時我諗，如果佢揸啲死飛仔跑車就唔得嘞，但係佢揸一架好Bulky
（笨重）、好古老嘅車⋯⋯咁就係佢囉。
「𠵱家，我都係俾佢100分！因為我揀得啱！哈哈！雖然佢唔可以話浪漫，但係佢好細心。我哋連結婚戒指都唔戴嘅（展示空蕩蕩的左手），因為我哋都覺得，唔一定要戴住隻結婚戒指，先可以維持到個婚姻。」
王馨平笑言，要維繫22年的婚姻，最重要是：「互相遷就！我哋有嗌交，但唔多嘅。當見到佢發脾氣發到不可收拾，咁我梗係鵪鶉啦！不過，通常過咗一、兩個鐘，我老公就會自動過嚟同我say sorry，無論佢啱定錯，都會主動say sorry先，咁咪好囉！哈哈！」
行動，從來也勝過千言萬語。
