昨晚（8日）《明愛暖萬心》有汪明荃、陸浩明、何沛珈、江美儀等四位司儀坐鎮，不過少有擔大旗做司儀嘅江美儀就可能緊張得濟，竟然喺直播節目中連續4次「食螺絲」，搞到場面非常尷尬。事後江美儀都即刻於IG發道歉文補鑊指：「I am so sorry! 」
少有擔任直播節目主持嘅江美儀，昨晚連同汪明荃、陸浩明、何沛珈三人齊齊主持《明愛暖萬心》。江美儀喺吳業坤表演完畢之後，出場讀出其中一份講稿時竟然突然「發台瘟」，雖然已經有曬「貓紙」，但都不斷食螺絲，將近一分鐘，前前後後口窒窒咗四次，連佢自己講講下都苦笑同搖晒頭，「明愛服務一路可以…以優化嘅延續，除咗係多謝一班有心嘅專業團隊之外，我哋亦都要多謝咁多年…一…咁多年嘅善長仁翁慷慨解囊，為明愛嘅教育…為明愛嘅服務…奠定……」講到呢到又忍唔住再睇講稿，先接住續說：「基礎，鞏固嘅基礎，關愛同行70載，燃亮希望照未來，我希望大家繼續支持明愛，以愛燃亮我哋嘅未來。」
江美儀都知道自己賴嘢，完騷之後就即刻於IG發文道歉補鑊：「對唔住呀！因為我live show經驗尚淺，出場又唔夠冷靜，執生能力又差，就係我嘅「甩漏」令原本滿分嘅show，而家變得不完美！我向大家道歉，我會好好反思，下次一定會做好自己！I am so sorry!」唔少圈內朋友如李佳芯、唐詩詠同余安安等人都有留言安慰。
昨晚另一節目主持司儀何沛珈都非常搶鏡。自選港姐以來一直皮膚白雪雪嘅何沛珈，琴日竟然變成「黑珍珠」，以一身健康膚色示人，仲能夠隱約從身穿露膊晚裝嘅何沛珈身上見到比堅尼嘅曬痕。雖然何沛珈突然黑咗幾度咁現身，但網民都大讚佢有靚樣搭救，完全唔介意呢個「朱古力版」何沛珈！
文章版權為新傳媒集團所擁有，原文請按： 网页链接
