藝人陳瀅早前孖朱敏瀚、周嘉洛等一齊出發泰國拍旅遊真人騷，尋日（1日）周嘉洛就喺社交網晒出眾人喺泰國玩嘅靚相，以為佢哋仲未拍完嘢，點知原來陳瀅一早就已經番到，仲同好姊妹何雁詩去咗澳門水上樂園玩，尋日何雁詩就大晒二人嘅水着衫，齊齊換黑色一件頭泳衣，一睇就知夾好晒Dress code。
何雁詩以英文寫道，指自己同閨蜜一齊渡過甜蜜假期，雖然自己最近忙於創作新歌及照顧小朋友，難得有得玩都真係好享受。相中就見佢中門大開，已為人母嘅佢，谷盡事業線嚟個大解放，相反陳瀅件泳衣就包到上頸，同平時大方派軍糧嘅打扮相比，今次就真係好保守啦。
