歌手張致恒同老婆雯雯2019年結婚至今，育有3子，不過婚姻生活就未如理想，甚至雯雯因為成日嗌離婚，畀網友戲稱為「離婚界KOL」。而今日（27日），雯雯又再喺社交網鬧爆張致恒，直指對方冇錢扮有錢，成日話轉頭畀錢買嘢比個仔食，完全唔顧及小朋友會唔會肚餓等需要，不過最令雯雯嬲到震嘅係張致恒連換手機錢都冇，直指張致恒：「到底一個人40歲點解可以咁不負責任？！我日日對住你冇病都變有病，我係預咗自己照顧晒成個屋企，但係我冇預計過，我要照顧你！」
另外，最令雯雯感到眼冤嘅則係張致恒冇工作之餘，又日日瞓喺屋企歎住享受：「日日可以若無其事咁歎坐喺度，有飯就食有屎就痾有覺就瞓，如果你係有貢獻嘅都冇所謂，當養一個工人。但可惜叫親你做嘅嘢，都係同我講『你係人，你要休息、你要瞓覺』！」
