台灣著名主持黃子佼，因被爆出性騷擾17歲網紅而公開道歉，並「攬炒式」點名大爆徐熙媛（大S）及丈夫具俊曄、妹妹徐熙娣（小S）、吳宗憲等13名藝人嘅重磅醜聞，又傳出佢疑自殺入院，其太太孟耿如經理人今日凌晨表示，黃子佼已冇生命危險，目前喺ICU有暫時清醒，但仍無法說話同表達。到了今午又傳出黃子佼已出院，對此，孟耿如表示：「不好意思，讓大家奔波了，我們會面對，不會逃避，但請給耿如一點時間。」
當中身陷不良嗜好爆料嘅大S，雖然已發聲明否認，不過其前夫汪小菲已急急由內地飛去台灣探視二人嘅一子一女，尋晚（19日）更係抱住阿仔汪希箖同自己阿媽張蘭連線直播，張蘭亦直接點出汪小菲依家人在台北。
以往曾令阿仔長相曝光惹大S發火嘅佢，今次就記得收埋仔仔樣貌，張蘭又時時叮嚀孫仔，唔好喺鏡頭前亮相，但孩子郁嚟郁去時，都有稍微露出少少側臉，汪小菲又叫阿仔同張蘭問好，張蘭一聽個仔嗌「奶奶」，就已經笑到花枝亂顫。網上有傳汪小菲係因為睇到黃子佼新聞，先會飛去台灣探視小孩，並且會喺台灣住一段時間，但未獲汪小菲證實。
另外，台北市警局表示，黃子佼對大小S嘅相關指控，發生地唔喺台灣島內，因無具體實證加上已過追訴期，將不會有偵辦動作。
