前港姐冠軍陳凱琳（Grace）同老公鄭嘉穎（Kevin）向來恩愛，每逢大時大節都有唔少創意慶祝，而今日（18日）適逢父親節，陳凱琳一家亦都有特別計劃慶祝，仲拍片喺社交網分享，罕有嘅「老婆視角」引嚟唔少網友羨慕。
雖然陳凱琳同鄭嘉穎嘅3個囝囝仲細，未識幫爸爸鄭嘉穎慶祝父親節，不過為咗可以畀囝囝一齊享受到節日嘅氣氛，鄭嘉穎就化身型男廚師親自下廚煮意粉畀屋企人食，望住鄭嘉穎一氣呵成咁一邊煮飯一邊同囝囝互動，認真溫馨又暖心。不過正當大家以為鄭嘉穎會細心擺盤之際，竟然畫風一轉將所有意粉同醬汁倒晒落枱，望住認真擺餐具嘅鄭嘉穎，就連2個囝囝都忍唔住呆一呆，好彩等2個囝囝反應過嚟之後，都即刻拎起叉開心享受美食，而陳凱琳則表示希望為小朋友創造更多開心回憶，將來大個仔可以同樣為爸爸製造驚喜，認真別出心裁。
