前港姐馬賽（現名馬菀迎）2019年同圈外男友結婚並誕下囡囡Camellia，婚後淡出幕前嘅佢專注相夫教女，甚少現身幕前，直到近年活躍於社交網嘅佢除分享親子日常點滴，更拍片分享養生及美容心得，轉戰養生KOL。尋日（15日）更喺社交網晒出一輯沙龍靚相，疑似為復出鋪路。
馬菀迎喺社交網寫道：「歲月賦予的不多也不少，「眼前」與「遠方」這兩個生存狀態的意象，讓眼裹的光鮮活而又克制，人生是個大的修行遊樂場，且行且珍惜～且行且修行。4年半，即將告別全職／半全職媽媽，重新全力出發！」更喺文尾Hashtag「演員馬賽」，對此唔少網友都十分捧場，表示期待新作外，相中嘅馬菀迎亦重回「迷你桂綸鎂」嘅顏值巔峰，並且整體望落都唔似生過BB，認真弗到漏油。
