《2023香港小姐競選》上周舉行首輪面試，一眾有如漆黑中嘅螢火蟲嘅靚女已獲網友熱烈討論，估唔到今日（16日）港姐覆試，仍有「漏網之魚」索爆佳麗悉數登場！
今日於電視城見到有唔少美女陸續登場，當中24歲OL、嚟自廣東嘅鄭泳君（Gwen）第一輪面試冇嚟，係因為家人要做手術，不過見佢以一襲斯文綠色碎花裙現身，但左手上大片彩色紋身非常搶眼，佢指紋身係自己設計，代表家人、自己及寵物，問及是否擔心紋身影響入圍？Gwen樂天回應：「盡量，佢哋唔鍾意都冇法。」
身高擁1米76、現為香港理工碩士生嘅陳旑（Fiona），今年22歲，佢同樣係今日先第一次面試，由同學提名，去年八月先嚟香港讀書，依家已有香港身份證，問廣東話唔正會否蝕底？佢即表示：「冇關係嘅，我好勤力。」態度積極。
而26歲鋼琴老師Cindy，則尋日（15日）由溫哥華返港，媽咪係提名人，佢亦喺香港長大，問到有冇信心？佢即答有，準備跳舞同彈琴。
韓味極濃嘅黎佩琳（Nichole）被問及年紀時，佢就笑稱自己係搭尾班車，亦係記者，同時都有教班，今次就被演藝學院老師提名。
